Vurkkodat go lávlaga dahje luođi man earát eai leat vel gullan? Dál soaitá áigi almmuhit dan, ja dá livččii ge buorre vejolašvuohta.
Beassášlávvordaga, njukčamánu 31. beaivvi, lágiduvvo Sámi Grand Prix 28. geardde Báktehárjjis, Guovdageainnus.
Ii galgga ovdal gullon
Jus dus lea luohti dahje lávlla mainna áiggošit oasálastit, mii ii leat ovdal almmuhuvvon dahje čuojahuvvon oallugiidda, de dus lea vejolašvuohta dál.
Luohti galgá leahkit sámi árbevirolaš juoiganmálle ja lávlla fas sámegillii.
Lávlagiid ja luđiid gaskkas válljejuvvojit dat guhtta buoremus lávlaga ja logi buoremus luođi.
Ruhtabálkkašupmi ja konsearta
Golbma buoremusa juoigan- ja lávlunoasis ožžot ruhtabálkkašumiid.
Juoigan- ja lávlunoasi vuoitiguovttos oažžuba stipeandda mas lea 50 000 ruvdnosaš árvu mainna galgá doallat konseartta čuovvovaš beassášmárkaniin Guovdageainnus.
Fállo maiddái dan golmma buoremus sadjái goabbat oasis searvat konsertii čakčamánus.
Dieđihanáigemearri lea mánnodaga, guovvamánu 19. beaivvi.
