Várut meahcceelliin – dat eai várut dus

Eallit vánddardit eanemusat čakčat ja lea stuora várra ahte ealli lea luotta alde. Dasa lassin lea váttis fuomášit elliid čakčaseavdnjadasas. 

– Ollugat ballet vuodjimis elliid njeaiga johtolagas, go dat iđistit nu fáhkka. Go vuodjá, de ferte čuovvut mielde hui bures, lohká NAF kommunikašuvdnaráđđeaddi Nils Sødal.

Jáhke várrehusšilttaide

Várrehusšilta lea luoddaguoras ovtta sivas, go doppe lea várra ahte ealli sáhttá ruohtastit luotta ala. Dan dihte leat ollugat geat attistit alla leahtuin, eai ge geahča dárkilit go vudjet várrehusšiltta meattá.

– Go oainnát várrehusšiltta mii čájeha ahte báikkis sáhttet leat ealggat, de lea dehálaš geahččat mii čuožžu dan vuolde. Das láve čuožžut man guhkás fertet váruhit earenoamážit. Geahča luoddaguoraid jus fuomášat juoidá mii lihkada dahje go čalmmit čuvget seavdnjadasas, lohká Sødal.

Ii leat nu ahte várra ii leat šat go lea meattildan báikki gos várrehusšilta lea. Biilavuoddji ferte čađat leat áicilin vuojidettiin.

– Ii leat nu ahte eallit dušše gávdnojit meahccebáikkiin. Mievri, rieban ja ruoiggut lávejit leat ássanguovlluin maid. Vaikko leahttorádji ii leat nu allat doppe, ja eallit leat ollu unnibut go ealggat ja eará sarvvaeallit, de ii beaškket seamma garrasit, muhto gánnáha čuovvut mielde ássanguovlluin, ávžžuha Sødal.

Go beaškkeha

Jus oainnát ealli rasttildeame luotta, de sáhttet leat eanet eallit das lahkosis. Dalle it ábut dušše geahččat dan ovtta eallái, go de soaittát beaškkehit nuppi njeaiga.

– Unnit leahtu ja bisán jus lea dárbu. Ale balddit ealli ja lea ge gearggus go ealli sáhttá bijadit biilla ovdii, lohká Sødal.

– Jus it nagot hehttet lihkohisvuođa, de fertet vuodjit maŋŋeoasi njeaiga seammás go goazadat nu ollu go nagodat. Muitte ahte galggat dieđihit go leat vuodján ealli njeaiga vaikko jáhkát ahte dat ii leat roasmmohuvvan, loahpaha Sødal.