Boazopolitiijat várohit gávdnan suoláduvvon ealgga njuovvanbázahusaid sullii guokte miilla oarjjabealde Kárášjoga márkana.
Boazopolitiijat várohit gávdnan suoláduvvon ealgga njuovvanbázahusaid sullii guokte miilla oarjjabealde Kárášjoga márkana.
Ávvir oaččui cavgileame bearjadaga veaigin, ahte Loddenjárgaguoikka buohta Iešjogaleagis leat bálkestuvvon njuovvanbázahusat. Doppe leat ge ollu doapparseahkat maid siste leat ja leat leamaš njuovvanbázahusat. Iežamet čalmmiiguin oinniimet juolgelahkiid, ađadávttiid, guokte sohppojuvvon beađbbi ja maiddái čielgadávtti mii lea sohppon.
(ášši joatká gova vuolde)
Govva: Josef Isak Utsi
Guomočoavjebázahusat
Báikkis lea maid duollji mii lea čuhppon guovtte lahkkái. Muđui leat maid bázahusat guomočoavjjis. Dan geažil mearridii ge Ávvir doaimmaheaddji dieđihit bázahusaid birra politiijaide.
(ášši joatká gova vuolde)
Imaštalaiga go guomočoavji lei das
Soaittáhagas leigga guokte politiija, geat leigga jođus nuorttas, geat álggos bođiiga báikái. Soai eaba háliidan searvat govvii ja jearahallamii, muhto mearrideigga dieđihit ášši viidáseappot iežaset vuogádagas, go aniiga imašin go guomočoavjji lea maid das.
Govva: Josef Isak Utsi
Suoláduvvon ealga
Ii mannán ge dan rájes guhká ovdal Boazopolitiija Magne Persen lei báikkis. Persen lea áibbas sihkar maŋŋel go lea iskkadan dárkilit njuovvanbázahusaid ahte dás lea sáhka suoládeames.
– Dat gal lea hui čielggas ahte njuovvanbázahusat leat bálkestuvvon vulos geainnus, nu ahte ealga ii leat dás njuvvon. Danne lea oaidnit dego soames livččii bálkestan njuovvanbázahusaid.
– Gii vuolgá geasehit guomočoavjji?
– Muhto dás lea maid guomočoavji. Das han čuožžila gažaldat, ahte gii bat guomočoavjji vuolgá geasehit meahcis vulos ja dán bálkestit geaidnogurrii? Juohkehaš gii ealggaid lea bivdán diehtá man jođánit lottit ja meahcceealiit čorgestit guomočoavjji. Lean ge áibbas sihkar ahte dat ealga ii leat lobálaččat njuvvon, go dás lea maid guomočoavji, lohká Magne Persen.
(ášši joatká gova vuolde)
Govva: Josef Isak Utsi
Bivdá veahki olbmuin
Dat bázahusat lea ge bálkestuvvon luotta ja Iešjoga gaskii dakkár báikkis gokko lea váralaš bissehit biilla ja dakko lea maiddái luoddaáidi. Muđui lea dakko hirbmat alla mielli johkii ja čiekŋalis jogašroggi gosa leat bálkestan bázahusaid.
Ávvira cavgileaddji gii ii hálit aviisii diehtá ahte garjját lea dás oidnon goit sullii beannot vahkku. Soames bisánasttii maid Magne Persen luhtte ja muitalii ahte dat njuovvanbázahusat leat leamaš sullii guokte vahkku das.
– Dát dáidá dakkár ášši masa dárbbašat veahki olbmuin geain soitet leat dieđut. Mun ávžžuhan ge olbmuid áinnas cavgilit midjiide jus dihtet maide dahje leat oaidnán maidege, dadjá Magne Persen.
