Gássafitnodaga ovddasteaddjit báhččuiga jámas, go boazodoallit ja dát guovttos báhčáladdagohte bissuiguin gaskaneaset. Dáhpáhus geavai dán mánu 19. beaivvi, Jamala-Nenetsa autonoma guovllus, Sibiras
– Fitnodaga ovddasteaddjit ja boazodoallit ledje fárrolaga bivddus go báifáhkka álge garrasit digaštallat maid nu. Digaštaladettiin báhčáladdegohte direktevrrat ja boazodoallit bissuiguin. Fitnodaga ovddasteaddjit bážahalaiga jámas. Sii geat ledje mielde báhčaleamis galget leat leamašan gárremin, muitala namahis gáldu politiijastruktuvrrain TASS ođasdoaimmahahkii. Dán čállá maid NRK Sápmi odne.
Namahis politiijagáldu deattuha ahte báhčáladdandáhpáhusas livčče sáhttán roasmmehuvvot vel eambbo olbmot.
Guokte fitnodatdirektevrra geat gulaiga Gazprom-nammasaš Ruošša gássafitnodahkii, gávdnuiga juovlamánu 21. beaivvi, Jamala-Nenetsa autonoma guovllus, Sibiras, guokte beaivvi maŋŋá dáhpáhusa.
Politiijat duođaštit ahte 22-jahkásaš jamalo-nenetsalaš boazodoalli lea dál áššáiduhtton go várohit su goddán Gasprom fitnodaga direktevrraid.
– Áššáiduhtton olmmoš lea váldon gitta. Politiijat dutket dál ášši. Bissu lea váldon eret olbmos, muitala politiijaid mediagulahallanolmmoš Irina Pimkina.
Rihkuslága mielde sáhttá 22-jahkásaš dubmehallat čohkkát giddagasas olles iežas eallima, jus lea goddán guokte olbmo.
Gasproma gássafitnodagas vurdet eambbo dieđuid ovdal go dát sáhttet cealkit maidege. Fitnodagas duođaštit ahte gottahallan olbmot leigga sin mielbargit.
