Dearvvašvuođaeiseválddit árvvoštallet dál gieldit snuvssaid main lea máhku, mii mielddisbuktá ahte dat fáhte beali dain olbmuin geat borret snuvssaid.
Ovddádusbellodat ii hálit diekkár gildosa, čállá Ovddadusbellodaga (OB) stuoradiggejoavku preassadieđáhusas.
Lea OB ságadoalli Åshild Bruun-Gundersen gii čállá ahte snuvssen ii leat nu várálaš go borgguheapmi, ja lea vuoitun juohke háve go muhtin olmmoš heaitá borgguheames ja baicca geavahišgoahtá e-sigareahtaid dahje snuvssaid.
– Oččodit olbmuid atnit eará nikotiidnabuktagiid, nu go snuvssaid, lea buorre dearvvašvuohtapolitihkka. Go dál evttohuvvo gieldit vuovdimis sullii 50 proseantta snuvssain mat dál vuvdojit, dat hehtte válljenfriddjavuođa snuvssariidda, čállá Ovddadusbellodaga Bruun-Gundersen.
Viidáset čállá son ahte 2000:s borgguhedje 31 proseantta álbmogis ja 2017:s dušše 11 proseantta.
Sii eai oainne manne galggašii jávkadit snuvssaid ja dagahit daid eallimiid heajubun geat juo snuvssejit.
– Dearvvašvuođa- ja fuolahusdepartemeanta áigu ovddidit ođđa duhpátstrategiija unnidan dihte duhpátgeavaheami Norggas. OD áigu bargat ahte duhpátstrategiijas mii ovddiduvvo ii leat mielde dat oassi mas gildet snuvssaid main lea máhku, čállá Bruun-Gundersen.