Sámeálbmot Bellodaga (SáB) riikačoahkkin lea válljen Bjarne Store-Jakobsena Unjárggas, Nuorta-Finnmárkkus, riikabellodaga ođđa jođiheaddjin.
Sámeálbmot Bellodaga (SáB) riikačoahkkin lea válljen Bjarne Store-Jakobsena Unjárggas, Nuorta-Finnmárkkus, riikabellodaga ođđa jođiheaddjin.
– Bellodaga váldobargun ovddasguvlui lea ásahit ođđa báikkálaš servviid ja nu nannet bellodaga ovdal sámedigge- ja stuorradiggeválggaid moatti jagi geahčen, lohká ođđa jođiheaddji.
Son čujuha buori válgabohtosiidda mannan čavčča gielddaválggain Unjárgga gielddas ja ahte bellodagas dál lea várresátnejođiheaddji Kárášjoga gielddas.
Nubbijođiheaddjin lea válljejuvvon Ann L. Finbog, Oslo. Muđui leat stivrralahttun válljejuvvon Rávdná Márja Niillasanieida Gaup, Unjárga, Tore Bongo, Áltá ja Inga Ravna Eira, Kárášjohka.
Birger Nymo, Oslos, gii lea jođihan bellodaga moanat jagiid, lei dieđihan ovdal jahkečoahkkima ahte son geassáda go háliidii čáhkket saji ođđa stivrii. Nymo lea jođihan bellodaga váttis áiggis ja oaivvildii áigi lei láddan earáide čáhkket saji bellodaga jođiheaddjin.
Bellodagas leat dál guokte áirasa Sámedikkis. Dát guovttes leaba válljejuvvon oktasaš áirrasin Norgga Sámiid Riikkaservviin (NSR) ja ovddasteaba Nuorta válgabiirre, mas Várjjat ja Deanu guovllu gielddat leat fárus.
Sadjásaš lahttun stivrii leat Anja Somby, Sirbmá, Simen Ellingsen Marjavaara, Stuorravuotna/Unjárga, Lisa Ravna Finbog, Oslo, Ingrid Nordal, Deatnu ja Einar Roska, Unjárga.
Ođđa válgalávdegoddái lea riikačoahkkin válljen Ragnhild Somby, Oslo, jođiheaddji, Bjørg Guttorm, Unjárga og Per Anton M. Utsi, Áltá.
