Mánáid- ja dásseárvodepartemeantta dáhttu diehtit makkár Norgga gielddas lea buoremus bajásšaddat. Vuoitogielda oažžu 250.000 ruvnnu bálkkašupmin.
Mánáid- ja dásseárvodepartemeanta juohká bálkkašumi juohke nuppi jagi.
Dál ávžžuhit fylkkamánniid, gielddaid, mánáid- ja nuoraidorganisašuvnnaid ja báikkálaš mánáid- ja nuoraidráđiid árvalit gielddaid mat ánssášivčče bálkkašumi.
Gáibádusat
Jury árvvoštallá gielddaid doaimma ja plána fuolahit mánáide ja nuoraide buori bajásgeassima.
Nana ovttasbargu gaskal gieldda etáhtaid ja bálvalussurggiid ja ovttasbargu almmolaš ja eaktodáhtolaš doaimmaid gaska maid deattuhuvvo, jury háliida oaidnit ahte oktasaš čovdosat ja doaimmat hehttejit olggušteami.
Gieldda gulahallan mánáiguin ja nuoraiguin lea maid hirbmat dehálaš go válljejit vuoitogieldda.
– Dán jagi dáhttu jury maiddái oaidnit ahte gielddas leat eastadandoaimmat mat bisuhit nuoraid skuvllas, bargguin ja astoáiggedoaimmain, čállá Mánáid- ja dásseárvodepartemeanta bovdehusas.
Áigemearri árvalit gielddaid bálkkašumi vuoitin lea čakčamánu 15. beaivvi.
250.000 ruvnnu
Bálkkašupmi geigejuvvo Mánáid- ja nuoraidkonferánssas mii lágiduvvo Bådådjos golggotmánu loahpageahčen.
Vuoitogielda oažžu 250.000 ruvnnu vuoitun, ruhtavuoitu galgá gieldda movttiidahttit ovddidit buori mánáid- ja nuoraidpolitihka.
Sámi gielda vuittii 2011:s
Guđa jagi áigi vuittii Gáivuona suohkan Mánáid- ja dásseárvodepartemeantta bálkkašumi.
Gáivuotna rámiduvvui danin go juohke jagi lágida oktasaš leairaskuvlla mánáide ja nuoraide, go suohkanis lea buorre gulahallan ja ovttasbargu mánáid suohkanstivrrain ja nuoraidráđiin ja danin go suohkanis lea hálbbes mánáidgárdefálaldat.
Jury válljii maiddái Gáivuona vuoitin 2011:s go ovddidit sámi giela ja kultuvrra, go suohkanii lea gelbbolašvuohta dehálaš ja go barget searvádahttit buot kultuvrra mánáid ja nuoraid.
