Guovdageaidnulaš Jørn Are Keskitalo (36) odne lea váldán sváinnasreive garra duojis. Ovddit háve seammá sváinnasreive garra duojis lei váldon jagis 2008.
Guovdageaidnulaš Jørn Are Keskitalo (36) odne lea váldán sváinnasreive garra duojis. Ovddit háve seammá sváinnasreive garra duojis lei váldon jagis 2008.
2013 rájes Jørn Are Keskitalo lea leamaš Duodjeinstituhta luhtte Guovdageainnus oahpahallin garra duojis. Odne ges, bearjadaga, 15 beaivvi ođđajagimánu 2016 Jørn Ares lea leamaš loahpaeksámen maid son lea ceavzzán. Dat mearkkaša dan ahte Keskitalo lea duođaštuvvon oahppanolmmoš gean sáhttá gohččodit virggálaččat duojárin garra duojis. Dát reivve addá vejolašvuođa Jørn Arii bargat duodjebagadallin, lágidit gurssaid dahje čiekŋalis dásis oahppat duoji. Ovdal Jørn Are Keskitalo seammá sváinnasreive lei ožžon eará olmmoš jagis 2008. Danin sihke sensorat ja Duodjeinstituhtas illudit go Jørn Are čađahii oahpahalli ortnega garra duojis.
– Dat lea hirbmat buorre, go muđui unnánat váldet sváinnasreive garra duojis. Muhto dáinna ovdána duodji go Jørn Are válddii eksámena, muitala Máret Gaup Eira Duodjeinstituhta bealis.
Maiddái sensor guovttos Biera Andersen ja Biera Ove Roska (goappašagat Unjárggas eret ja leaba duojárat) eaba čiega iežas movtta.
– Dán gal oaidná ahte lea viehka čeahppi. Moai oinniime ovdal giittii ahte Jørn Are lea bargan, guhka lea leamaš oahpus, ja lea čeahppi. Hui čeahppi hábmet, hui čeahppi hervet. Ja dál go lea váldán eksámena oinniime ahte Jørn Are lea čeahppi. Dagai visot nu mo galgá, muitaleaba sensor guovttos meastá oktanaga.
Eambbo nuoraid oažžut
Sihke Duodjeinstituhta kontuvrra jođiheaddji Máret Gaup Eira ja sensorguoktásiid mielas duodjái, ja earenoamážii garra duodjái, berrešii oažžut eambbo nuoraid.
2008 rájes gollan gávcci jagi ja dán áigodagas lei váldán sváinnasreivve garra duojis Jørn Are Keskitalo.
– Dát lea várra danin go unnán duojárat muđui ge. Aŋkke unnán leat garra duojis. Galggaše nuorat eambbo duddjot, geahččaba čilget Biera Andersen ja Biera Ove Roska dan manne gávcci jagis dušše okta olmmoš lei váldán dán oahpu.
Duodjeinstituhta bealis namuhit vel dan ahte unnán duodjebáikkit gos livččii vejolaš váldit dán oahpu.
– Sáhttá leat dat ahte olbmuin ii leat vejolašvuohta dán váldit go eai leat heivvolaš duodjebáikkiid gos dán čađahit olggobealde Guovdageainnu, eará guovlluin. Jus livčče eambbo dakkáraš báikkiid, de livčče soaitit eambbo olbmot geat áiggošedje čađahit oahpahalli ortnega garra duojis.
-Duhtavaččat go ohppet ruovttus
Ieš Jørn Are jáhkká ahte rekrutering ii leat áibbas buorre. Danin su mielas ná unnán olbmot váldet dakkáraš oahpu.
– Dat lea heajos rekrutering go ná unnánat beroštit váldit sváinnasreivve garra duojis. Maiddái olbmot várra duhtavaččat go ohpet duoji ruovttus.
Seammás ge lasiha ahte odne gávdnojit buorit doarjjaortnegat ja vejolašvuođat oahppat duoji.
– Gávdnojit iešguđetlagan doarjjaortnegat jus áigu leat oahpahalli. Sámediggi addá bálkká go lea oahpahalli, ja gávdnojit stipeanddat duojároahpahalliide. Leat buorit duodjeskuvllat sihke Guovdageainnus ja Johkamohkis.
Oahpu gáccát ja fitnodaga álggahit
Boahtte áiggis duođaštuvvon duojár háliidivččii álggahit iežas duodjefitnodaga.
– Áigumuš álggahit iežan fitnodaga. Muhto juste dál álgán guovttejahkásaš ohppui muorraduojis. Áigumuš lea eallit dujiin.
Iežas lohká šaddá hui ollu bargat jus galgá ceavzet iežas fitnodagain.
