Gáfestallan museas gos muitalit «Dan vajálduhtton kompaniija» birra ja čájehit govaid Porsáŋgguvuonas 1930 rájes 1960 rádjái.
Porsáŋggu musea, Porsáŋggu historjásearvi ja Kveana instituhtta bovde oktasaš museagáfestallamii Kveana instituhttii Bissojogas. Gáfestallanbotta čájehit dološ govaid guovtti oasis, mat leat vižžon museavuorkkás ja luoikkahuvvon govaid.
Doppe juhket maid dieđuid “Johkafanas 2016” -dokumentašuvnna prošeavtta birra, ja čájehit mo galgá geavahit dan digitála musea interneahtas.
Govven: Riinakaisa Laitila/RDM.
Vuosttaš oassi
Govvačájeheami vuosttaš oasis, muitala Roger Albrigtsen “Dan vajálduhtton kompaniija” birra. De oahpásmuvat Norgga 2. Bergkompaniija vásáhusaide, dalle go Finnmárkui bohte, nuppi máilmme soađi maŋimuš soahtedálvvi. Muitalettiin čájeha maid govaid Finnmárkku- ja Bissojogaguovllus, dan kompaniija mátkkis boldon eatnamiiguin.
Kompaniija norgga gánddaide gárte dramáhtalaš ja lossa vásáhusat juohkebeaivválažžan. Muhtimat sis eai goassige šat máhccan ruovttuideaset.
Nubbi oassi
Govvačájeheami nuppi oasis, čájeha historihkkár Arvid Petterson govaid mat leat govviduvvon Porsáŋgguvuona nuorttabealde 1930 rájes gitta 1960 rádjai. Govat leat luoikkahuvvon muhtin priváhtavuorkkás ja digitaliserejuvvon.
Museagáfestallama ulbmil lea oahpásmuvvat báikki olbmuide ja dovddusin dahkat musea vuorkkáid. Museagáfestallamiidda sáhttá nuvttá searvat, ja oažžu oastit gáfe ja gáhkuid. Musea vuovdá maid báikkálašhistorjjá- ja soahtehistorjjágirjjiid, čállá Riddoduottarmusea preassadieđáhusas.
Báiki lea Kainun institutti – Kveana instituhtta, gaskavahkku 27.01.2016, dii 18:00-20:30.
