-Almmuhus-
-Almmuhus-
OĐĐASATVáillaha risttalaš sáddagiid rádios, go NRK Sápmi čuohpai beali fálaldagas eret

Váillaha risttalaš sáddagiid rádios, go NRK Sápmi čuohpai beali fálaldagas eret

Journalista

-

-

Guovdageainnu girku diakona váillaha risttalaš sáddagiid NRK Sámi rádiofálaldagas. Son vásiha ahte olu vuorraset olbmot váillahit fálaldaga mii lei, muhto dál lea dat beliin unniduvvon.

Guovdageainnu girku diakona Ellen Kari Sara mielas lea váidalahtti go NRK Sápmi lea váldán eret beali risttalaš fálaldagas.

Ovdal sáddejuvvui rohkos sotnabeaivvi, ja nuppádassii mánnodaga. Dál ii sáddejuvvo go sotnabeaivvi, ja dat lea áidna risttalaš sátta NRK Sámis.

– Mun imaštan manne galget risttalaš sisdoalu váldit eret, ja manne čuhppet dan eret, mii lea juo unnán, lohká diakona Ellen Kari Sara.

 

– Ii leat beare stuora risttalaš fálaldat

Son deaivvada olu vuorasolbmuiguin diakonabarggus, ja vásiha ahte oallugat váillahit rohkosa mii mánnodatiđida sáddejuvvui.

– Lea dávjá ahte vuorasolbmot eai váidal, muhto lohket dušše ahte lea heittot go ii gullo. Dan gulan mun dávjá. In huma dušše iežan ovddas, muhto olu vuorasolbmuid. Dieđán maid ahte olu bargoolbmot guldalit rohkosa iđđes barggus, ja dál dat ii leat šat. Mu mielas orru heittot, ii leat beare stuora risttalaš fálaldat. Boares olbmot han gullet dušše sámi rádio, eai ge eará rádio, lohká Sara.

 

Olbmot áigot áigeguovdilis ságaid

NRK Sámi váldodoaimmaheaddji Mona Solbakk čilge ahte go iđitsátta «Buorre iđit Sápmi» lea šaddan davviriikkalaš ovttasbargun, de leat sii vuoruhan ahte eai botke sáddaga eará prográmmaid dihte.

Son maid deattuha ahte dat mii ovdal gullui mánnodatiđida, lei dat seamma mii lei sotnabeaivvi gullon.

– Leat guorahallan ja gávnnahan ahte olbmot áigot iđđes gullat áigeguovdilis ságaid. Dan man eat dieđe lea, sáhtášeimmet go sáddet rohkosa eará áiggis, árabut. Mii diehtit vuorraset olbmot leat árabut julggiid alde go earát, lohká Solbakk.

(Ášši joatká gova vuolábealde)


NRK Sámi váldodoaimmaheaddji Mona Solbakk

Sáhttá rievdat

NRK Sápmi lea rievdadan hámádaga, muhto Solbakk deattuha ahte sin prográmmafálaldat sáhttá ain rievdat.

– Leat obbaáigge rievdadeame, ja lea ge hui buorre go oažžut dieđuid dan birra. Sáhttá ahte mii gávdnat eará áiggi sáddagii. Sáddaga sáhttá maid gullat neahttarádios álo, muhto mii diehtit ahte vuoras olbmot guldalit njuolggosáddagiid, lohká Solbakk.

-Almmuhus-