32-jahkásaš gii aitto dubmejuvvui čohkkát čieža jagi go galgá leat niibbiin goddán dievddu Leavnnjas juovlamánu 2019:s, váidá Lágamánnerievtti duomu.
Dan muitala dievddu bealušteaddji, advokáhtta Marius Ihlebæk Ságat avisii.
– Lágamánneriekti lea unnán deattuhan dáhpáhusaid áššis nu go ahte mu klieanta čuojahasttii AMK:i dasttánaga, ja geahččalii gádjut čukkohallan dievddu, lohká Ihlebæk.
Polskalaš dievdu, Andrzej Karol Antosiak, gávdnui čukkohallan Leavnnjas Porsáŋggu gielddas juovlamánu 3. beaivvi 2019:s. 40-jahkásaš varddii jámas go lei niibbiin čukkohallan.
Juovllaid ovdal dubmii Hålogalándda lágamánneriekti 32-jahkásačča čieža jagi čohkkát. Son lea maid dubmehallan máksit 600 000 ruvnno gottáhallan dievddu váhnemiidda ja su guovtti mánnái.
Duopmu lei guokte jagi ja čieža mánu oaneheappot go duopmu maid Sis-Finnmárkku diggegoddi celkkii mannan geasi. Dievdu ii mieđit iežas ráŋggáštussivalažžan. (©NTB)
