Bearjadaga lea dán mánu 13. beaivi. Leat olu diiddat čadnon dán beaivái. Don doloža rájes lea sihke bearjadatbeaivi ja lohku 13 leamaš lihkohisvuođamearka.
Tryg Forsikring dáhkádusfitnodat dieđiha preassadieđáhusas ahte juste daid bearjadagaid go dáhton deaivá 13. beaivvi ala, de dieđihuvvojit unnit lihkohisvuođat go eará bearjadagaid.
– Mii leat geahččan maŋemuš jagiid statistihka, ja duohtavuohta lea ahte daid bearjadagaid, go dáhton lea 13., de eai leat liikká olu lihkohisvuođat.
Dat guoská buotlágan lihkohisvuođaide. Leat 12 proseantta unnit biilalihkohisvuođat daid bearjadagaid, ja golbma proseantta unnit mátkkoštanvahágat.
Arvid Steen Tryg Forsikring:s jáhkká dat lea go olbmot leat eambbo várrogasat juste dán beaivvi.
