Duorastaga vástidii Preassa Fágalaš Lávdegoddi (PFL) Ketil Lenerd Hansena váidagii TV3 kanála vuostá. PFL čállingoddi ii oaivvil TV3:a rihkkon buriid preassadábiid.
Preassa Fágalaš Lávdegoddi lea ožžon vihtta sierra váidaga «Paradise Hotel» sápmelaččaid govvideamis. PFL organisašuvnnačálli Kjell Nyhuus ii loga háliidit kommenteret sin cealkámuša vuođul dađi eambo ja čujuha dušše mearrádussii.
Cealkámušas deattuhuvvo ahte ii oktage ášši leat loahpalaččat gieđahallon ovdal go váldolávdegoddi lea buktán iežas oaivila.
Cealkámušas čállo earret eará ahte govvageavaheapmi sáhttá oaivvilduvvot ártegin, iige leat áššálaš, muhto prográmmas ii daddjo goassige mihkkege fasttiid sápmelaččaid birra, iige čájehuvvo vašši dan oktavuođas.
Jus lávdegoddi vuhtiiváldá čállingotti cealkámuša, lea ášši gárvásit gieđahallon ja loahpahuvvon. Sii geat leat váidán ášši, sáhttet buktit vel sierra cealkámuša čállingotti mearrádussii vahkku sisa.
Behtton
– Dat mii lea váttisvuohta sin cealkámušas, ahte leat deattuhan dan maid prográmma oasseváldi Martine dadjá, čilge Ketil Lenert Hansen gean máttuid gova geavahedje «Paradise Hotel« nammasaš prográmmas. Son lei maiddái váidán ášši PFL:i maŋŋil go ávvir sutnje cavgilii govvageavaheami birra.
TV3 preassaovddasvástideaddji Line Vee Hanum lea duhtavaš PFL čállingotti cealkámuššii ja ahte sii leat ádden govvageavaheami ulbmila.
Dán ášši birra sáhtát eambbo lohkat ihttá báberáviissas.
