Tromsa ja Finnmárku šaddá ođđa stuora fylkka namma, mii gokčá njealjádas oasi Norgga areálas.
Tromsa ja Finnmárku šaddá ođđa stuora fylkka namma, mii gokčá njealjádas oasi Norgga areálas.
Alimus politihkalaš jođiheapmi ja fylkkaráđđeolmmái galgá čohkkát Tromssas. Golbma ođđa ossodaga galget bargat riikkaidgaskasaš áššiiguin ja davviguovlluin, álbmotdearvvašvuođain ja johtalusain. Dat golbma ođđa ossodaga ásahuvvojit Čáhcesullui.
Ii galgga okta ge bargi dárbbašit fárret ovttasteami dihtii.
Dá leat muhtun váldooasit maid dat guokte fylkka leat šiehttan, maŋŋil go garra šiehtadallamat leat leamaš.
– Sihke vuoitán ja vuoittáhallan
Gielddaministtar Monica Mæland (Olgeš) rámida fylkkapolitihkkariid, geat leat šiehtadallan.
– Leat čájehan nana jođiheami, ja lea hui dehálaš mearrádus. Ledjen oalle sihkar ahte bođiidet ovttaoaivilii, muhto ii ná jođánit. Leat hui ilus go dál lehpet mearridan, ja ahte eat dárbbaš departemeanttas mearridit, logai stáhtaráđđi go šiehtadusa vuolláičálle Gardermoenis duorastaga.
– Dás leat buohkat addán ja váldán. Vásihan ahte goappaš bealit leat vuoitán ja vuoittáhallan, lohká Mæland NTBii.
Son geassá ovdan ođđa ossodaga mii Čáhcesullui álggahuvvo, mii galgá riikkaidgaskasaš áššiiguin bargat.
– Lea buorre mearrádus. Dát boahtá leat dehálaš ovdáneamis, lohká gielddaministtar.
Lossa barggut
Knut Storberget lea jođihan šiehtadallamiid. Son lea maid fylkkaolmmái Hedemárkkus ja Opplánddas, lohká ahte ođđa fylkkagielda galgá váldit olles guovllu atnui.
– Vásihan ahte goappaš bealit leat áššálaččat. Leat leamaš lossa barggut, muhto seammás leat kreatiivvalaččat gávdnan buriid čovdosiid, lohká Storberget.
Son deattuha ahte ii okta ge bargi galgga dárbbašit fárret oktiičaskima geažil. Son lasiha maid ahte bohtet geográfalaččat juogadit jođiheddjiid ja nubbijođiheddjiid ossodagain.
– Lea buorre bargu dahkkon, sihkkarastin dihtii ovdáneami regiovnnas masa leat nu buorit, logai ovddeš stáhtaráđđi go šiehtadusa vuolláičálle.
–Ii okta ge ožžon nu go háliidan
Finnmárkku fylkkasátnejođiheaddji Ragnhild Vassvik (Bargiidbellodat) oaivvilda ahte šiehtadallamat loahpa loahpalaččat mielddisbuvttii šiehtadusa mainna buohkat leat duhtavaččat.
– Mii leat addán ja váldán. Ii okta ge leat ožžon juste nu go ledje álgo álggus háliidan, muhto šiehtadus lea dakkár mainna sáhttá eallit, logai son NRKii maŋŋil vuolláičállima.
– Mii leat olu bargan maŋemuš beivviid, ja ii okta ge leat addán eambbo dahje unnit go earát. Mii leat loahpalaččat ollen modellii mii sáhttá leat vuođđun go ihttá rájes huksegoahtit ođđa fylkka, logai Tromssa fylkkaráđijođiheaddji Willi Ørnebakk (Bargiidbellodat).
Dávvin
Ođđa fylkkasuohkan oažžu maid sámegiel ja kveanagiel nama. Sámegillii šaddá namma Dávvin, ja kveanagillii Ruija.
Okta mainna barge guhká, lei gažaldat gos veahkkefylkaolmmái galgá čohkkát. Dál šaddá okta goappá nai gávpogis.
Ođđa fylkkadikkis šaddet 57 áirasa. Čoahkkimat galget dollot sihke Tromssas ja Finnmárkkus.
Tromsa jođiha oktasašlávdegotti
Oktasaš lávdegoddi galgá jođihit ja ráhkkanahttit oktiičaskimii. Lávdegottis galget 36 áirasa, 19 Tromssas ja 17 Finnmárkkus. Jođiheaddji galgá Tromssas, ja muđui mearrida lávdegoddi ámmáhiid.
Báris šiehtadallamat leat leamaš maŋemuš vahkku, maŋemuš jándora leat bealit leamaš Gardermoenis hoteallas.
Šiehtadallanlávdegottis ledje Lise Svenning (Olgeš) Finnmárkkus, ja Ivar B. Prestbakmo (Guovddášbellodat) Tromssas.
