SVL-N lea gearggus leat sámi valáštallamiid goavdeorganisašuvdnan. Ikte čoahkkinaste sámi valáštallanorganisašuvnnat ja Sámediggi boahtte áiggi organiserema birra.
SVL-N lea gearggus leat sámi valáštallamiid goavdeorganisašuvdnan. Ikte čoahkkinaste sámi valáštallanorganisašuvnnat ja Sámediggi boahtte áiggi organiserema birra.
Sámediggi dáhtu ođđa organiserema sámi valáštallamis.
Ulbmil lea ásahit goavdeorganisašuvnna mii čohkke buot sámi valáštallamiid.
– Mii leat fállan ahte sáhttit goavdeorganisašuvdnan. SVL-N fátmmasta dál máŋga suorggi valáštallamis, ja danin lea lunddolaš ahte mii sáhttit goavdin sámi valáštallamis, lohká Sámi Valáštallanlihttu – Norgga jođiheaddji Kåre Olli.
SVL-N jođiheaddji Kåre Olli
Gergosat rievdadit organisašuvnna
Ođđa organiseremis dáhtot čohkket sihke ruđalaš ja olmmošlaš návccaid.
Dál gártá Sámediggi gulahallat golmmain organisašuvnnain, muhto boahtte áiggis galggašii njuovžilat gulahallan ja sámi valáštallan galggašii ieš vuoruhit ruhtageavaheami.
– Mii leat smávva searvvit ja oaidnit buohkat dárbbu čohkket valáštallamiid. Mii eat leat konkluderen mo galggašeimmet organiseret, muhto jus mii šaddat goavdeorganisašuvdnan de leat gergosat rievdadusaide, lohká SVL-N jođiheaddji Kåre Olli.
Ii doarjjo SVL-N goavdeorganisašuvdnan
Sámi Heargevuodjin Lihttu ii leat ovttaoaivilis ahte SVL-N galggašii sámi valáštallamiid čohkket.
– Mii leat gaskariikkalaš lihttu, ja de šaddá váttisin ahte Sámi Valáštallanlihttu – Norga galggašii min bajábealde. Mu mielas galggašii baicce gaskariikkalaš SVL bajimusas. Mis lea dáhtu ahte SHL ja FA Sápmi doalahuvvojit nu go dál, muhto árvalit ahte mii sáhttit váldit miellahttovuođa SVL:s, lohká SHL presideanta Mikkel-Per Sara.
SHL presideanta Mikkel-Per Sara
Dehálaš čatnat Sámi
SHL mielas lea dehálaš čohkket buot valáštallamiid miehtá Sámi go dát loktešii árvvu sámi valáštallamis.
– Midjiide lea hui dehálaš ahte gaskariikkalaš barggut doibmet. Mun in jáhke gilvvuid doaibmat eará riikkain jus mii gohčoduvvot dušše SVL-N. Lea hui dehálaš čatnat olles Sámi oktii. Suoma ja Ruoŧa Sámedikkit maid galggašedje čuovvolit organiserema ja ruhtadeami vai loktešedje sámi valáštallama árvvu doppe maid, lohká Sara.
Dehálaš iežas dárbbuid gokčat
FA Sápmái ii leat nu dehálaš makkár organisašuvdna doaibmá sámi valáštallamiid goavdin, sidjiide lea baicce dehálaš ahte ođđa organiseren galgá vuoiggalaš buot beliide.
– Mii doarjut ođđa organiserema, muhto midjiide ii leat nu dehálaš guhtemuš organisašuvdna galgá doallat sámi valáštallamiid čoahkis. Mis leat baicce čielga oaivilat mo organisašuvdna galgá doaibmat ja ahte buot valáštallamiidda juhket ruđaid vuoiggalaččat, lohká FA Sámi stivraláhttu Arnt Marius Eriksen.
FA Sámi stivraláhttu Arnt Marius Eriksen
Eanet ruhta valáštallamii
Son muitala viidáset ahte buohkat háliidit suddjet iežaset valáštallamiid ja bissut sierra lihttun.
Seammás jáhkká ahte nagodit doahttalit Sámedikki áigumuša rievdadit organiserema sámi valáštallamis.
– Muhtin láhkai fertet čoavdit organiserema nu go ruhtadeaddji gáibida. Stuorimus buorrin ođđa organiseremis lea ahte hálddahusgolut njidjet, ja dalle goaikkeha doaivumis eanet ruhta valáštallamiidda, lohká Eriksen.
Ovttaoaivilis joatkit barggu
Sámediggeráđđi Henrik Olsen muitala ahte leat geahčadan SVL-N árvalusa organiseremii, muhto ahte ievttá čoahkkimis eai leat makkárge mearrádusa dahkan.
– Mii áigut eambbo bargat dáinna. Mis leat golbma organisašuvnna geain lea hállu ovttasbargat, muhto sii fertejit nuppástuhttit ja heivehallet iežaset oktii, dadjá son.
Sámediggeráđđi Henrik Olsen
Davviriikkalaš ovttasbargu
Sii leat maid ságastallan davviriikkalaš ovttasbarggu birra ja digaštallan galggašii go ásahit áibbas ođđa lihttu vai rievdadit ja buoredit Sámi Valáštallanlihttu.
– Lea áibbas lunddolaš ahte sámi valáštallamiid čohkke, eat sáhte beroštit riikkarájáin dás. Nu go dál lea, de ii doaimma organiseren vaikke lea davviriikkalaš ovttasbargu. Mii fertet buoredit dán ja gávnnahit modealla mii fátmmasta maiddái Ruoŧa ja Suoma beal sámiid, dadjá sámediggeráđđi Henrik Olsen.
Bovdejit ovttasbargui
Norgga Sámedikkis lea áigumuš ahte ođđa organiseren sámi valáštallamis galgá duohtan 2017 giđa, maŋit jagi galggašii jo ođđa goavdeorganisašuvdna bušeahtas.
Sámediggeráđđi Henrik Olsen dadjá iežaset maiddái Ruoŧa ja Suoma sámi eiseválddiid bovdet ovttasbargui.
– Lea lunddolaš loktet ášši Sámi Parlamentáralaš ráđđái go ulbmil lea gávdnat davviriikkalaš vuogádaga sámi valáštallamii, lohká Olsen.
