Suoidnemánus ja borgemánus billahuvvet ollu dihtorat, TV:t ja jiekŋabovssat, bajándálkkiid geažil.
Suoidnemánus ja borgemánus billahuvvet ollu dihtorat, TV:t ja jiekŋabovssat, bajándálkkiid geažil.
Tryg dáhkádusfitnodaga logut čájehit ahte Norgga dáhkádusfitnodagat mákse diibmá 205 miljovnna ruvnno dáhkádusruđaid, vahágiid dihte maid álddagasat dagahedje.
Dát logut čájehit man olu buhtadus lea mákson oktiibuot priváhta olbmuide ja fitnodagaide.
– Máksingolut leat alladat, ja dát geavvá juohke geasi, dadjá Tryg dáhkádusfitnodaga preassaovddasvástideaddji Arvid Steen.
Álki eastadit
Statistihka mielde boahtá bajándálki dahkat sihke unnit ja stuorát vahágiid 2000 priváhta dállodollui dán geasi.
– Álddagasaid dihte billahuvvet maiddái ollu elektronalaš rusttegat, ja vahágat maid álddagasat dahket šaddet divrrasin dáhkádusfitnodagaide. Lihkus dagaha álddagas hárve viessobuollimiid, muitala Steen.
Steen muitala ahte lea álki eastadit vahágiid maid álddagas dagaha.
– Dávjá ávkkuha gaikkehit kontávttas eret, go ieš leat mannan. Dát lea álkimus vuohki eastadit dakkár vahágiid, dadjá Steen.
Oaččut buhtadusa
Dáhkádusfitnodagat mákset buhtadusa vahágiid maŋŋel, maid bajándálki dagaha, jos dus lea viessodáhkádus. Vaikko dáhkádusfitnodagat mákset goluid jos jiekŋaboksa billahuvvá, de ávžžuha Arvid Steen maiddái gurret jiekŋabovssa go vuolggát lupmui, go ovdal lea geavvan nu ahte jiekŋaboksa lea billahuvvan bajána dihte ja biepmut leat de liegganan ja suvron.
