Odne beassat gullat oažžu go John André Eira Folkelarm-bálkkašumi.
John André Eira almmuhii diibmá luohte CD Buolvvas bulvii, mii lea su vuosttaš skearru ja mas lea árbevirolaš juoiganmálle.
Ieš evttohas lohká su mielas lea buorre go olbmot árbevirolaš luođi maid evttohit Folkelarm-bálkkašupmái:
– Ii leat nu dávjá árbevirolaš luohti evttohuvvo, dat lea hui somá mu mielas.
Son oaččui mánnodaga dieđu ahte lea nammaduvvon bálkkašupmái, ja dovddasta ahte fertii gal googlestit mii dat Folkelarm lea. Son ii loga diehtit vel sihkkarit movt doppe lea, muhto diet han leat stuora doalut.
Musihkalaš bargu
– Dát lea stuorimus dáhpáhus mu musihkalaš barggus. Mu musihkalaš bargu ii leat dákkár mii dáččamáilbmái guoská nu bearehaga. Vuoitima ektui eai leat mus nu alla jurdagat. Sávvamis vuoittášin, dat livččii maid suohtas vaikko ieš alddis lea dat juo vuoitu go lean nammaduvvon, dadjá John André Eira.
Musihkkabiras čoaggana
Juohke jagi čoaggana Norgga álbmotmusihkkabiras ávvudit buoremus álbmotmusihka mii lea almmuhuvvon borgemánu 1. beaivvi ja suoidnemánu 31. beaivvi áigodagas. Dán jagi válljejuvvojit vuoitit kategoriijas Solo, Árbevirolaš ovttasdoaibma, Dokumentašuvdna ja Rabas klássa, dasa lassin vel Jagáš álbmotmusihkkár.
Arvvas mielde
Muđui lea Arvvas joavku nammaduvvon Rabas klássii, joavkku vuosttaš skearruin «Remembrance» joavkkus leaba mielde Sara Marielle Gaup Beaska ja Steinar Raknes. Ovdal leat dán suorggis vuoitán Niko Valkeapää jagi 2008:s ja Inga Juuso/Harald Skullerud fas jagi 2012:s.
Dán jagi ledje 50 skearru dieđihuvvon bálkkašumi fágalávdegoddái ja lávdegoddi lea árvvoštallan ja nammadan 16 artistta/joavkku daid gaskkas. Bálkkašupmi geigejuvvo Riksscenes bearjadaga čakčamánu 25. beaivvi diibmu gávccis.
Karen Anna Buljo
