Odne jienastedje Stuoradikkis ahte ráđđehus sáhttá rievdadit lágaid ja njuolggadusaid eastadandihte koronavirusa leavvama, ja eai dárbbat dan dihte mannat Stuoradikki čađa.
– Min lágat ja njuolggadusat eai leat ráhkaduvvon dákkár dillái ja hástalussii mas dál leat. Stuoradiggi lea dan dihte dohkkehan lága mii galgá sihkkarastit ahte riikka stivrejuvvo doaimmalaččat kriisaáiggis. Njuolggadusaid ferte jođánit sáhttit rievdadit, nu ahte mis earret eará leat doarvái olbmot dearvvašvuođabálvalusas ja NAVas, ahte olbmot ožžot máksojuvvot beaiveruđaid ođđa njuolggadusaid mielde, ahte vistit jođánit sáhttet geavahuvvot gaskaboddosaš buohcceviessun, orrunsadjin dahje rájusin váikko leatge meinnejuvvon eará ulbmilii, dadjá Bargiidbellodaga jođiheaddji, Jonas Gahr Støre, gii lea áššejođiheaddji ja lea jođihan barggu Stuoradikkis láhčindihte dán lága dohkálaččat.
Stuoradiggi ráddje ráđđehusa koronalága
Láhka mii lea dohkkehuvvon odne, lea olu ráddjejuvvon das maid ráđđehus evttohii. Ráđđehus evttohii ahte láhka galgá bisttit jahkebeali, muhto Stuoradiggi mearridii ahte galgá mánu bisttit. Láhkateavsttas čuožžu ahte láhkkanjuolggadusat mat biddjojuvvot, galget almmuhuvvot Stuoradiggái, ja láhkkanjuolggadusat eai dohkkehuvvo eare jus eambbo go okta goalmmádas oassi Stuoradikkis dorjot dan.
– Eanetlohkku Stuoradikkis ledje ovttaoaivilis dasa ahte ráđđehusa evttohus lei beare viiddis ja bisttii beare guhká. Mii leat váldán vuhtii vuosttehágu riikka oaivugas juristtain ja rievdadan lága nu ahte doaimmahanválddit leat nu unnit go vejolaš, nu oanehaččat go vejolaš ja proseassat leat nu čađačuovgi go vejolaš, lohká Gahr Støre preassadieđáhusas.
Dušše daid lágaid maid ferte jođánit rievdadit
Ráđđehusa evttohusas bivde oppalaš doaimmahanválddi, muhto Stuoradiggi lea ráddjen koronalága sisttisdoallat dušše daid lágaid mat ferte jođánit rievdadit. Deattuhuvvo ahte ii sáhte geavahuvvot eare jus lea dárbu.
