Sámi allaskuvla lea ožžon stuora dutkanbarggu mas galgá háhkagoahtit dieđuid das movt ođđa oahppoplánat váldojuvvojit atnui sámi skuvllain ja muđui sámi ohppiide. Galgá maid iskojuvvot láhčá go Fágaođastupmi dili nu ahte sámi ohppiid vuoigatvuođat nannejuvvojit.
Goahtejođiheaddji John Marcus Kuhmunen lea ilus ja rámis go Sámi allaskuvlla fágabiras lea vuoitán dán gilvvu ja dál besset dutkagoahtit Fágaođastusa váikkuhusaid sámi oahpahusa hárrái.
– Mun giittán min čeahpes fágabargiid nanu ovdabarggu ovddas, earenoamážit háliidan namuhit professor Kamil Özerk, vuosttašamanueanssa Ylva Jannok Nutti ja professor Nils Dannemark geat leat ovttas Sámi allaskuvlla eará fágabargiiguin ja hálddahusa vehkiin hábmen buori dutkanvuođu. Dát mearkkaša olu min dutkanbirrasii ja addá vuordimis mávssolaš ja dehálaš dieđuid eiseválddiide ja servvodahkii. Mii illudit oaidnit bohtosiid dán dutkamušas ja čalmmustahttit allaskuvlla fágagelbbolašvuođa dán suorggis, dadjá Kuhmunen.
5 miljovnna allaskuvlii
Prošeakta álggahuvvo 2020 čavčča ja bistá gitta 2025 rádjái. Fágaođastumi árvvoštallama stivrra mearrádusa vuođul lea Oahpahusdirektoráhtta juolludan Sámi allaskuvlii 5 mill NOK dan barggu čađaheapmái.
– Mis leat ollu vuordámušat ahte dán prošeavttas nagodit oažžut ođđa ja dárbbašlaš dieđuid guovddáš ovdánahttinproseassain mat Norgga skuvllain leat jođus muhtun jagiid ovddosguvlui. Fágaođastumi bokte lea eamiálbmogiid ja sámi perspektiivvat ožžon čielgasit rolla go ovddit oahppoplánain. Dán prošeavttas beassat čohkket dehálaš dieđuid movt diet perspektiivvat duohtan dahkkojit, dadjá Elaine Munthe, gii lea Stavanger Universitehta professor, ja gii maid jođiha prográmmastivrra mii árvvoštallá fágaođastumi.
Golbma oasseprošeavtta
Vuosttaš oasseprošeakta galgá guorahallat movt sámi sisdoallu ja sámegielat, árvvut ja kultuvra ovdanbuktojuvvojit oahppoplánain, movt dat ipmirduvvojit ja sisafievrriduvvojit skuvlii.
Nuppi oasseprošeakta galgá guorahallat máid fágaođastus mearkkaša oahpahussii sámegielas ja sámegillii.
Goalmmát oasseprošeakta galgá guorahallat movt fágaođastus váikkuha sámi skuvllaid doaimmaide ja ohppiid oahppamii.
