Oažžu girjebálkkašumi girjjiin Dielddanuori sámiid birra.
Landslaget i språkling samling (LSS) dieđiha preassadieđáhusas ahte searvvi stivra lea mearridan addit Språklig samlings girjjálašvuođabálkkašumi girječállái Johan Ingvald Borgosii su girjji ovddas «Samer ved storhavet».
Borgos illudii go gulai dan.
– Illudin dieđus sakka go ožžon dan ođđasa. Giellabálkkašupmi fágagirjji ovddas ii leat nu dábálaš. Go oidnen geat ovdal leat ožžon bálkkašumi, de hirpmahuvven oalát. Mun lean dat njealját davvin, ja čuovun Arvid Hanssena, Laila Stiena ja Magnar Mikkelsena. Dan gal anán stuora gudnin, muitala Borgos.
– Borgos geavaha hupmangiellahámi, ja čájeha ahte alladási girjjálašvuođa sáhttá ráhkadit almmolaš gielas. Njuovžilis ovdanbuktinhápmi heive bures giellahápmái, ja ásaha buori rámma govvádusas olbmuin geat elle garra eavttuid vuolde, čállá stivra iežaset mearrádusa birra. Girji muitala sámi álbmoga kultuvrra ja historjjá birra, geat ásset oarjebealde Dielddanuori.
– Ovttaskas olbmot govviduvvojit ealas ja liekkus vugiin, ja girjjis oažžu gova sámi kulturoktavuođadovddus ja hutkáivuođa geavaheames luonddu, sihke eatnamis ja mearas, čállá stivra.
Girjjálašvuođabálkkašupmi ruhtaduvvo Toams Refsdal girjjálašvuođafoanddas, ja geigejuvvo girjegiellačálliide geat geavahit hupmangiellahámi girjegielas iežaset barggus.
