Dál lea dat áigodat goas ollu studeanttat fárrejit vuosttas geardde sierra orrut, eret váhnemiid ruovttus. Dalle lea dieđus ollu maid ferte vuoruhit. Muhto studeanttat eai dárbbaš gal giksašuvvat ijaid jus eai leat máksán dáhkádusa.
Nuorra studeanttat sestet ollu ruđa go geavahit váhnemiid stohpogálvodáhkádusa. – Dalle easka jus studeanta rievdada čujuhusa Álbmotregistaris de ferte ieš háhkat stohpogálvodáhkádusa, dadjá Tryg Dáhkádus preassaovddasvástideaddji Arvid Steen.
Studeantakollektiivvas sáhttet leat eará dáhkádusnjuolggadusat mat gusket ássiide, dat lea vuos makkár čujuhusa leat registreren Álbmotregistarii.
– Vaikke oastát ásodaga, de sáhtát geavahit váhnen stohpogálvodáhkádusa daid stohpogálvvuide maid leat ruovttus váldán mielde. Ođđa gálvvuid maid oastát dohko gosa leat fárren, dasa dárbbašat sierra dáhkádusa, ja jus leat rievdadan čujuhusa álbmotregistaris dahje fárren studeret olggobeallái Davviriikkaid, muitala Arvid Steen.
Ale vajálduhte eará dáhkádusaid
Go fárret eret váhnemiid ruovttus, vaikke vel oanehis boddui, de fertet háhkat alccet eará dáhkádusaid.
– Mii ávžžuhat buot studeanttaid tevdnehit sihke mátkkoštan- ja lihkohisvuođadáhkádusa, lassin stohpogálvodáhkádussii. Eanaš dáhkádusfitnodagain lea sierra dáhkádusat nuoraide, dadjá Arvid Steen Tryg dáhkádusfitnodagas. Dasa lassin ávžžuhan vel studeanttaide lámisvuođadáhkádusa.
Oadjebasvuohta dáhkádusa máksit
Studeanttain lea jo muđui čavges ruhtadilli ja Steen ádde bures go eai vuorut dáhkádusaid máksit.
– Jo, mii dáhkádusfitnodagas vuorjat vehá, dáhkádusaid oastit, go mii leat nu máŋgii vásihan ahte studeanttat gevvet álásin go eai leamaš dat rievttes dáhkádusat. Dáhkádus lea oadjebas sihkkarvuohta ja máŋgga dáhkádusfitnodagain gávdnojit nuoraide ollislaš dáhkádusat.
