Sámi Dáiddárráđi stipeandalávdegoddi lea 2018 juovlamánus juohkán 2019 dáiddárstipeanddaid. Stipeandalávdegoddi juohká bargostipeandda, bargostipeandda nuorat dáiddáriidda, oanehisáiggestipeandda ja iešguđetgelágan smávit stipeanddaid.
2019:s leat bargostipeanddaid sturrodagat 268 000 ruvnno. Bargostipeanddat bistet gaskal 1 ja 5 jahkái, ja bargostipeanda nuorat dáiddáriidda bistá gaskal 1 ja 3 jagi.
Oanehisáiggestipeanda lea oaivvilduvvon dáiddáriidda geat háliidit bargostipeandda áigodaga oanehat áigái, gaskal mánu ja guhtta mánu. Oanehisáiggestipeandda bajit rádji lea 133 800 ruvnno. Iešguđetlágan smávit stipeanddat sáhttet juolluduvvot gitta 50 000 ruvnno rádjái.
2019:s leat juolluduvvon guokte bargostipeandda, okta bargostipeanda nuorat dáiddárii, guokte oanehisáiggestipeandda ja logi smávit stipeandda:
- Susanne Hætta gii orru Čáhcesullos, lea ožžon bargostipeandda golmma jahkái. Susanne Hætta lea girječálli geas leat áigeguovdilis girjeprošeavttat eará dáiddáriid birra, maiguin son lea ožžon fuomášumi.
- Marja Bål Nango gii orru Ivgovuonbađas oažžu 3-jahkásaš bargostipeandda. Nango lea čájehan ahte máhttá ráhkadit filmma ja son bargá nana sámi birrasis ja lea ollesolmmožin dušše bargan filmmain. Nango filmmat leat vuoitán máŋga dehálaš bálkkašumiid main leat ollu dehálaš fáttát.
- Saia Stueng Kárášjogas eret lea ožžon 2-jagáš nuorat dáiddáriid bargostipeandda. Saia Stueng lea nuorra čeahpes girječálli gii čállá sámegillii sámi nuoraide, ja su vuosttaš romána Hamburgerprinsessá lea bures váldon vuostá. Stueng áigu stipeanddain čállit joatkaga Hamburgerprinsessá girjái.
Oanehisáiggestipeanda
Elin Kåvenii lea geigejuvvon fas oanehisáiggestipeanda. Kåven lea komponista ja musihkkár ja háliida ovddidit konseapta «den arktiske alven». Su musihkka galgá leat dehálaš oassin dain. Son áigu stipeandaáigodagas laktit máŋga dáiddasuorggi muitalit historjjá mas ođđa digitálalaš reaiddut galget gaskkustit su musihka.
Eará smávit stipeanddat mat leat juolluduvvon
| Ramona Irene Myrseth | Bivttashábmejeaddji | Álggahanstipeanda | 40 000 ru. |
| Marja Bål Nango | Filbmadahkki | Giellakonsuleanta veahkki | 50 000 ru. |
| Kenneth Hætta | Dramatihkkár | Mátkestipeanda | 40 000 ru. |
| RIsten Sokki | Girječálli | Mátke- ja oahppostipeanda | 20 000 ru. |
| Ánndaris Rimpi | Komponista | Ávnnasstipeanda | 40 000 ru. |
| Karen Anne Buljo | Juoigi ja girječálli | Ávnnasstipeanda | 27 000 ru. |
| Kristin Tårnesvik | Govvadáiddar | Ávnnasstipeanda | 50 000 ru. |
| Elina Waage Mikalsen | Govvadáiddar | Ávnnas, mátki, kursa ja honorára | 50 000 ru. |
| Hanne Grieg Hermansen | Govvadáiddar | Ávnnasstipeanda | 50 000 ru. |
| Josef Halse | Govvadáiddar | Ávnnasstipeanda | 34 500 ru. |
