Boazodoallit eai olihan oažžut oamastanvuoigatvuođa guohtuneatnamiidda Stiertnás Meahcceduopmostuolu bokte.
Boazodoallit eai olihan oažžut oamastanvuoigatvuođa guohtuneatnamiidda Stiertnás Meahcceduopmostuolu bokte.
_ Mii leat hui duhtavaččat duomuin, dadjá nubbinjođiheaddji Geavlavuona gilisearvvis Stiertnás, Synnøve Helen Nuth Pedersen NRK Finnmárkui.
Pedersen ballá mii livčče dáhpáhuvvat jus boazodoallu livčče ožžon oamastanvuoigatvuođa eatnamiidda Stiertnás.
– Mii livččiimet soaitimis massit rivttiid murjet ja oaggut. Dan ii dieđe. Dat leat jurdagat mat leat leamaš ahte ii beasa šat meahccái, dadjá son.
Beahtahallan duomuin
Leat guokte joavkku boazodoalus geat leat ovddidan gáibádusa oamastanvuoigatvuođaide Stiertnás. Advokáhtta Andreas Larsen gii ovddasta Sara-joavkku, lohká su áššehasaid beahtahallan.
– Mii áigut árvvoštallat duomu, ja de oaidnit joatkit go mii áššiin. Dat ii leat áibbas sihkar, muhto mii árvvoštallat goit, dadjá advokáhtta.
Ollugat geavahan guovlluid
Fylkkasátnejođiheaddji Runar Sjåstad (Bb) lea ilus go boazodoallu ii ožžon oamastanrievtti.
– Dát leat guovllut maid ollugat leat geavahan, ja lea duođaštuvvon ahte guovllut leat guhkit áiggiid geavahuvvon báikki olbmuin ovdal go lei boazodoallu doppe. Ii leat álo nu ahte boazodoallu lei ovddemus, lohká Sjåstad NRK Finnmárkui.
