Kristian Solbakken ja Miramart vuittiiga V5-2 gilvvus sotnabeaivvi Hársttáid doalvešiljus. Dát lei heastta goalmmát vuoitu oanehis áiggis.
Kristian Solbakken ja Miramart vuittiiga V5-2 gilvvus sotnabeaivvi Hársttáid doalvešiljus. Dát lei heastta goalmmát vuoitu oanehis áiggis.
Lávvordaga besse Stall Solbakkenis fas ávvudit vuoittu, go sin heasta Miramart bođii vuosttažin doavlegilvvuin Hársttáin. Kristian Solbakken lei vuodján Kárášjogas gitta Hársttáide. Sus ledje guokte heastta maiguin gilvalii, ja vuittii vuoittuid goappaš heasttain. Galbmavaratheasttain Miramart bođii vuosttažin mollii, ja lieggavaratheasttain Sweet Starlight bođii viđádin.
Diđii ahte boahtá vuoitu
Solbakken lea hui duhtavaš, muhto ii čiegat ahte diđii ovdal juo ahte vuoitá Miramart heasttain.
– Dovden liggemis, diimmu ovdal vuolgaga, ahte manná bures. Riŋgejin ge ruoktot ja lohken ahte in leat goassege leamaš eambbo sihkar vuoitit, go dál. Manai hui, hui bures. Lean rievdadan veahá balánssa heasttas, ja dat lei issoras buorre. Dat lei doppe gos jáhkken galggai leat, ja gilvu šattai olu losibun, nu ahte lei hui stuora dáhpáhus vuoitit.
Buorre doaivva Miramartii
Vuoddji lohká ahte livččii sáhttán vel jođáneappo mannat, muhto ii lean dárbu. Miramart bijai ge ođđa persovnnalaš olahusa jiekŋašiljus.
– Lei buorre dovdu, dainna heasttain gal sáhttá viidásit mannat. Ii noga diesa diet heasta gal, dat šaddá dušše buorebun.
Solbakken čilge ahte son lea vuoitán lagabui 100 000 ruvnno Miramart heasttain.
– Mun birgen vel muhtin muddui dáppe Hársttáin. Go 150 000 álgá lahkonit, de fertet fas oaidnit. Mii leat aiddo ožžon dan johtui, ja vuodjit nu guhká go lea foarbma. Dás duohko álgá deaivvadit buoret heasttaiguin, muhto dat birge vel daiguin maid. Ovttatmano go orru foarbma niedjame, de mii eat šat gilval, ja fertet hárjehallagoahtit, vai lea fas gárvvis boahtte geassái, muitala Kristian Solbakken.
Stálla doaibmá, danne lihkostuvvet
Stall Solbakken lea bures lihkostuvvan gilvvuin maŋemuš áiggi. Kristian Solbakken lohká dat lea stálladoaimma dihte.
– Dat doaibmá bures, go buohkat barget iežaset barggu. Stállanieiddat leat hui stuora oassi min lihkostuvvamis, ja ferten gal lohkat dieđus ahte biebmu maid lea. Mii buvttadit biepmu ieža, ja dat lea kvalitehtabiebmu. Dat maid dagaha ahte sáhttit hárjehit heasttaid eambbo.
– Mus leat buorit olbmot mu birra, ja dat doaibmá bures go buohkat čuvvot dan plána mii lea biddjon, lohká Solbakken.
Kristian Solbakken ii dieđe vel gosa nuppes vuolgá gilvalit, ja goas.
– Jáhkán Hársttáin lea ođđajagis fas gilvu, muhto áiggun Ruoŧa beallái maid vuolgit. Doppe leat veahá buoret vuoittut, ja veahá heajut heasttat, de leat veahá geahppasit gilvvut. Ferten vuos geahččat movt dál šaddá, lohká Solbakken.
Miramart eaiggát, Amy Linnea, lea Ávvir journalistta Anne Rasmus nieiddaš ja Kristian Solbakken su ovttasássi.
