Olu olmmoš lei vuolgán geahččat Sámi Fashion Showa Guovdageainnus, gos guhtta duojára ja bivttashábmejeaddji besse čájehit gálvvuideaset. Lágideaddji Charlotte Eira ii jáhke ahte eambbosat livččii šat čáhkat latnjii gos čájáhus lei.
Olu olmmoš lei vuolgán geahččat Sámi Fashion Showa Guovdageainnus, gos guhtta duojára ja bivttashábmejeaddji besse čájehit gálvvuideaset. Lágideaddji Charlotte Eira ii jáhke ahte eambbosat livččii šat čáhkat latnjii gos čájáhus lei.
Gaskavahkku lei Guovdageainnu Thon Hoteallas bivttasčájáhus Sámi Fashion Show, gos gávcci duojára ja designera besse čájehit iežaset gálvvuid. Ledje oallugat boahtán geahččat go modeallat vázze catwalkaráigge, ja čájáhalle iešguđetlágan čiŋaid.
Maŋŋil bivttasčájáhusa ledje márkanat gos geahččit besse oaidnit ja oastit gálvvuid.
Designerat ledje Design MJHuuva, Anne Fenger Design, Ávži Design, Erica Huuva, XAK duodji, Ann Sofie Jonsson, Juhls Silvergallery ja Reinlove. Anne Fenger Design ja Design MJHuuva beasaiba čájehit iežaska goarrun biktasiid. Ávži Design čájehii ulloliinniid. Erica Huuva lei iežas silbbaiguin ja XAK duodji fas iežas čoarvedujiiguin. Ledje maid Reinlove bivttasmearkka biktasat modeallain alde.
Lágideaddji Charlotte Eira lei hui duhtavaš go nu ollu olbmot ledje boahtán.
— In jáhke ahte livččii čáhkat eambbo olbmot latnjii gos showa lei.
Lágideaddji álgojurdda lei ahte duojáriidda galgá leahkit báiki gos besset čájehit ja vuovdit gálvvuid. Dáin duojáriin ii leat gávpi gos vuvdet gálvvuideaset, duššo neahttagávppit. Charlotte Eira áiggui sidjiide addit vejolašvuođa čájehit gálvvuid, go su mielas ii leat seamma diŋgot gálvvuid neahta bokte.
Geahččiguovttos Elen Anne Triumf ja Biret Inger Anne Eira Buljo leigga čiŋadan iešgorrojuvvon dujiiguin.
