Johanne Båtnes lea nu ilus go ávvudeamit šaddet stuorábut ja stuorábut jagis jahkái.
Halti kultursála lei dievvan go olusat ledje boahtán ávvudit Sámi álbmotbeaivvi. Koordináhtor Johanne Båtnes muitala sis lei fiinna beaivi ja ávvudeamit šaddet stuoribun jagis jáhkkái.
– Daid maŋemus jagiid leat ávvudeamit šaddan stuorisin. Buohkat leat mielde ávvudeame Sámi álbmotbeaivvi, sihke sápmelaččat, kvenat ja dážat. Dán jagi lei Halti kultursála spagga dievva, ledje badjel 200 olbmot boahtán ávvudit ja muhtumat fertejedje boardagis čohkkát, dadjá Båtnes.
Ráissa sátnejođiheaddji Hilde Anita Nyvoll sávai bures boahtima buohkaide kulturlávddis. Eahkedis gulloje sihke sártnit, luođit ja lávlagat. Sámediggeráđđi Hans Ole Eira lei eahkeda sáhkadoalli.
– Hans Ole Eira searvvai Sámedikki ovddas ja lei eahkeda sáhkadoalli. Lei hirbmat somá oaččut Sámedikkis guossi, dat dego lokti min ávvudeami. Mis ledje maid olu čeahpes lávlut, sihke skuvllain ja earát. Doppe gullui sihke Máze luohti, Rolffa Hjerteknuser lávlla ja olu eará, dadjá Båtnes.
Ávvudeami loahpahii Sámi artistta Ágy, son juoiggastii Halti luođi.
