Evttoheaddji muitala ahte Asta lea čeahppi juohkit iežas vásáhusaid ealli sámi birrasis ja eallinlágis stuorát máilbmái.
Ávvir lea bivdán lohkkiid sáddet evttohusaid geaidda galggašii addot veaháš fuomášupmi ovdal juovllaid. Mii ohcat olbmo gii buktá moji ja ilu, juogo bargosajis dahje astoáiggis. Mii ohcat árgabeaisáŋgáriid.
Gudrun Lindi čállá ahte Asta Mitkijá Balto lea ovdamearkan ja inspirašuvdnan gilážiid ássiide, ii dušše Kárášjoga gielddas.
– Son lea guoibmás ja smáđáhkes olmmoš guhte juogada muitalusaid ja rávvagiid mo ovddidit ja dikšut eallinilu ja návddašit eallima Sámi gilis.
Bargan sámi servvodaga ovddas
Gudrun ákkastallá ahte Asta lea čeahppi juohkit iežas vásáhusaid ealli sámi birrasis ja eallinlágis stuorát máilbmái, son muitala ahte dainna leat hui rápmásat.
– Son eandalii movttiidahttá ja fuomášuhttá sámekultuvrra mávssolašvuođa ja mo sámi árbevieruid, ja jurddašan- ja eallinvugiid sáhttá árvvosmahttit árgabeaivvis, maiddái almmolaš gaskavuođain.
Viidáset čállá maid ahte Asta lea bargan sámi servodaga ovddas iešguđet láhkai ja máŋggain dehálaš virggiin, erenoamážit oahpaheami suorggis.
– Son searvá servodatdigaštallamii gos čalmmustahttá oainnuid mat leat dehálaččat sihke eallinmoktii ja birgejupmái smávit servodagain ja gilážiin.
Ávvir lea geahččalan oažžut Asta ságáide, muhto son dađi bahábut ii astan hupmat.
Juovlamánu geiget mii Ávviris juovlafuomášumi olbmuide geat ánssášit liigefuomášumi barggu ovddas maid dahket illun earáide. Cavgil midjiide gii ánssášivččii juovlafuomášumi. Čális e-poastta post@avvir.no. Čális oanehaččat manne juste dat olmmoš ánssášivččii juovlafuomášumi.
