Dát njealjis háliidit ahte sin eadni ja vuonesássa oččošii juovlafuomášumi, ja sin čilgehusa mielde lea ge Monica albma árgabeaisáŋgár.
Ávvir lea bivdán lohkkiid sáddet evttohusaid geaidda galggašii addot veaháš fuomášupmi ovdal juovllaid. Mii ohcat olbmo gii buktá moji ja ilu, juogo bargosajis dahje astoáiggis. Mii ohcat árgabeaisáŋgáriid.
Ørjan Balto Hansen, Nina M Balto Hansen, Aina K Balto Anti ja Mailinn Anti Eira leat ge sádden midjiide evttohusa árgabeaisáŋgárii, ja sii evttohit Monica Balto Anti.
– Mii háliidit skeŋket juovlafuomášumi min eadnái ja vuonesássii. Son ánssáša rámi danin go son lea áŋgir, doaimmalaš, veahkkái ja lea hirbmat barggán. Son ii bisán ii goassige vaikko vel sus lea ge MS-dávda, iige leat seamma buorre vázzinbalánsa go dearvvaš olbmuin, čállet evttoheaddjit.
Buollisearra
Monica lea guhká áŋgiruššan Sirpmá IL ovddas, ja lea maid searvvi jođiheaddji. Son lea dávjá njunnošis lágideamen valáštallangilvvuid sihke mánáide, nuoraide ja maid rávisolbmuide.
– Dasa lassin lokte son orrunmovtta Sirpmás go dávjá lea mielde lágideamen iešguđetlágan doaluid gilážis mii heive buot ahkášaččaide, čállet evttoheaddjit.
– Ii das galle, de son maid álo njuike jus muhtin dárbbaša veahki. Earret eará lea áŋgir veahkehit iežas vuoni Sirpmá buvddas gálvodiŋgojumiin ja eará doaimmain mat buvddas leat, ja láve dávjá vuojadanváktan Sirpmá IL ovddas Deanušaldis.
– Mii oaidnit su
Monica lea maid politihkkár ja lea Deanu Gurutbellodaga stivrralahttu ja maid Romssa ja Finnmárkku Gurutbellodaga nubbijođiheaddji.
– Čakčat ges lea isidis mielde čakčabargguin Čorgasis ja kohkke sidjiide geat leat gárdebargguin ja hoide dállodoalu. Son bargá maiddái Byggebistand AS:s, ja min oainnu mielde orru leamen álo olámuttos kundariidda, danin go sus lea kantuvra sihke ruovttus Sirpmás ja Deanušalddis, čállet evttoheaddjit ja jotket:
– Min mielas lea dehálaš ahte Monica oažžu fuomášumi, danin go son duođaid ánssáša dan ja mii háliidit ahte son galgá diehtit ahte mii oaidnit su ja su barggu, ja leat hui giitevaččat dan ovddas. Vaikko sus leat ollu doaimmat leaš dal barggus, Sirbmá IL:s, politihkkemis, dahjege ruovttus, de lea son álo movttat ja vuoruha áiggi iežas lagamuččaide.
Ávvir ii leat ožžon Monica Balto Anti ságaide, muhto juovlafuomášupmi lea sutnje jođus poastta mielde.
Juovlamánu geiget mii Ávviris juovlafuomášumi olbmuide geat ánssášit liigefuomášumi barggu ovddas maid dahket illun earáide. Cavgil midjiide gii ánssášivččii juovlafuomášumi. Čális e-poastta post@avvir.no. Čális oanehaččat manne juste dat olmmoš ánssášivččii juovlafuomášumi.
