Ártni orohaga boazodoalli Aslak Anders I. Gaup ja su viellja Johan Isak Gaup leigga dán jagi plánen guottehit guhtongárddi siste, muhto nu ii šaddan go soames lei ihkku rahpan verráhiid ja luoitán ealu olggos.
Ártni orohaga boazodoalli Aslak Anders I. Gaup ja su viellja Johan Isak Gaup leigga dán jagi plánen guottehit guhtongárddi siste, muhto nu ii šaddan go soames lei ihkku rahpan verráhiid ja luoitán ealu olggos.
– Mii leimmet miessemánu vuosttaš beaivvi álgán botket luovvasiid ja ihkku beal ovtta áiggi, heittiime ja plána lei joatkit nuppi iđit. Go bođiime iđđes, de lei olles eallu luiton olggos, neahtaid ledje gaikon vulos ja gavdnjenbáttiid čuohppan gaskat, muitala Aslak Anders I. Gaup.
Jagi bargu duššái
Gaup lea fuolastuvvan, go dáinna lágiin manai bargu áibbas duššái, masa leigga vieljain ráhkkanišgoahtán juo jagi áigi.
– Moai leimme áigon áiddi siste guottehit go galggai leat boraspireeastadeaddji doaibma, ja leimme hárjehit álgán ealu borrat fuođđariid. Das ii šaddan dan háve mihkkege, ja dál šadde mastadit dan nuppi lahkái, siidii mii olle fargga. Nu manná eallu guottetbáikái nu movt dábálaččat, dassái go mearkugoahtit mihcamáraid áigge, muitala son.
(Ášši joatká gova vuolábealde
Priváhta govva.
Imaš manne lea dáhpáhuvvan
Gaup lohká ealu olggos luoitin lea njulgestaga saboteren ja sutnje lea hui imaš manne ná lea muhtun dahkan.
– Mis lea máilmme buorre oktavuohta báikkálaš olbmuiguin, leat ollu oahppásat ja olbmát dáppe ja leat álo hui bures boahtin. Mun in dieđusge dieđe gii lea bargan dán, muhto doppe gávdnojit olbmot maid mat eai leat nu buorit sápmelaččaide, muhto nu lea juohke sajis, oaivvilda son.
(Ášši joatká gova vuolábealde)
Priváhta govva
Áigu váidit politiijaide
Siida ii leat vuos váidán ášši politiijaide, muhto Aslak Anders I. Gaup áigu váidit ášši.
– Jáhkán mun manan váidit dán politiijaide, vaikko dáidá váttis gávdnat sivalačča. Ášši goit juobe registrerejuvvo politiijaide, lohká son.
