Rune ja Inger Anne guovttos bargaba juovllaid áigge veahkehit nuoraid, vuorrasiid, oktoássiid ja bearrašiid geain leat ekonomalaš váttisvuođat.
Ávvir lea bivdán lohkkiid sáddet evttohusaid geaidda galggašii addot veaháš fuomášupmi ovdal juovllaid. Mii ohcat olbmo gii buktá moji ja ilu, juogo bargosajis dahje astoáiggis. Mii ohcat árgabeaisáŋgáriid.
Heidi Boine lea evttohan ahte Rune Olsen ja Inger Anne Utsi galggašeigga oažžut juovlafuomášumi. Soai bargaba «Karasjok Bilberging».
– Soai leaba máŋggaid jagiid veahkehan olbmuid geat dárbbašit veahki oažžut ravddaid deaivvadit, čállá Heidi.
Rune ja Inger Anne leaba čoaggán ruđaid veahkehandihte olbmuid geain lea gáržžes ekonomalaš dilli, go reanttut leat loktejuvvon ja muđui divru visot servodagas.
– Soai leaba oastán borramuša, muoraid ja eará maid olbmot leat dárbbašan ja addán daidda geat daid dárbbašit.
Inger Anne dadjá ahte lea hui somá oažžut juovlafuomašumi. Dat lea duođaštus ahte olbmot oidnet sudno barggu, ja ahte sudno bargu lea mearkkašahtti olbmuide.
– Vuosttašettin dat lea hui dovdduide čuohcci, go aistton olbmot oidnet ja leat giitevaččat, go moai letne bargan dán barggu nu ollu jagiid.
Joavkkuin ovttastallat
Rune ja Inger Anne guktui lea dehálaš čohkket joavkku juovllaide, dán soai leaba dahkan jo ollu jagiid. Oallugat leat boahtime sudno lusa.
Leat go dudnos plánat juovllaide?
– Nu mo leat leamaš ollu jagiid, čohkket munno joavkku ja leat singuin ovttas, dat lea munnuide hui divrras.
Juovlamánu geiget mii Ávviris juovlafuomášumi olbmuide geat ánssášit liigefuomášumi barggu ovddas maid dahket illun earáide. Cavgil midjiide gii ánssášivččii juovlafuomášumi. Čális e-poastta post@avvir.no. Čális oanehaččat manne juste dat olmmoš ánssášivččii juovlafuomášumi.
