Sámediggi ja šiehtadusbealit Sámiid Duodji ja Duojáriid Ealáhussearvi leat soahpan ođđa ealáhusšiehtadusa duodjái 2021. Boahtte jagi rámman lea biddjojuvvon 7,35 miljon ru.
Sámediggeráđđi Hans Ole Eira (Gb) lea duhtavaš go sohppojuvvui ođđa šiehtadus.
– Sámediggeráđđái lea leamaš deaŧalaš vuoruhit sierra doaibmabijuid mat leat mielde buhttemin dietnasa massima koronadili geažil, dadjá ovddasvástideaddji sámediggeráđđi Hans Ole Eira preassadieđáhusas.
– Massán dietnasa
Koronadili geažil leat fitnodagat ja ealáhuseallin massán dietnasa, seamma guoská duodjeealáhussii. Ođas 2021 šiehtadusas lea danne sierra juolludus 810 000 ru koronadoarjjan. Vuođđun ortnegii ja meroštallanvuđđui lea iežas duoji vuovdin 2019:s.
– Ain lea deaŧalaš vuoruhit duoji ealáhussan ja doaibmabijuid ovddideamis ja mearkagálvohuksemis. Koronadilli lea eanet dahkan áigeguovdilin ahte fitnodagat gávnnašedje ođđa márkaniid, ođđa juohkinčovdosiid ja ođđa vugiid movt organiseret iežas doaimma, dadjá Eira.
Várren ruđaid
Ealáhusšiehtadusas lea earret eará várrejuvvon 1,15 miljon ruvnno investeremiidda, ovddidandoaibmabijuide, konsuleantaveahkkái, ásahandoarjjan ja prošeavttaide.
80 000 ruvnno lea maiddái várrejuvvon gelbbolašvuođa buorideapmái ja kurssaide 2021:s, ja 2,5 miljon ruvnno doaibmadoarjjan.
600 000 ruvnno lea várrejuvvon márkanheiveheapmái ja mearkagálvohuksemii. Vuovdima ovddideaddji doaimmat leat mielde dán ortnegis.
Go guoská duodjestipendii, de lea rámma dán jagáš šiehtadusas 150 000 ru. fievrriduvvon jahkái 2021.
Dát dahkkojuvvon šiehtadus Sámiid Duoji, Duojáriid Ealáhussearvvi ja Sámedikki gaskka galgá dohkkehuvvot Sámedikki dievasčoahkkimis juovlamánus.
