Vuosttaš sámediggepresideanta ja son gean oallugat gohčodit sámerievtti «áhččin», čuovuiga Alimusrievtti go Kárášjoga álbmoga advokáhtat čilgegođiiga ášši.
Sámedikki vuosttaš presideanta ja Finnmárkokommišuvnna lahttu Ole Henrik Magga ja sámerievtti «áhčči» Carsten Smith čuovuiga goappašagat Kárášjoga-ášši Alimusrievttis disdaga, go Kárášjoga-álbmoga advokáhtat Caroline Lund ja Lasse Gommerud Våg čilgegođiiga sin beali áššis.
Smith lei alimusriektejustitiarius áigodagas 1991–2002, ja son barggai 30 jagi sámi vuoigatvuođaid nannemiin. Son earret eará jođihii Sámi vuoigatvuođalávdegotti áigodagas 1980–1985. Dan barggu olis ásahuvvui Sámediggi.
Ii Smith, iige Magga háliidan kommenteret áššái.
