Olmmáivákki oaggunfestivála ii lágiduvvo boahtte geasi koronadilálašvuođa geažil. Dattege lea olbmuin vejolašvuohta vuoitit biilla.
Dán jagi ii lágiduvvo Olmmáivákki oaggunfestivála. Koronadilálašvuohta lea dan mađe eahpesihkar ahte ii leat vel dihtosis sáhttá go geassemánus čohkket olu iešguđetge guovllu olbmuid seamma sadjái.
Danin leat Olmmáivákki nuoraid valáštallansearvvi ja Oaggunfestivála stivrrat mearridan šluhttet boahtte geasi doaluid.
Olmmáivákki oaggunfestivála oktavuođas lávejit vuovdit vurbbiid ja dainna gal jotket lágideaddjit. Dat mearkkaša ahte olbmuin ain lea vejolašvuohta vuoitit biilla. Vurbbiid gesset geassemánu 26. beaivvi ja dat sáddejuvvo interneahta bokte.
