Politiijain Oarje-Finnmárkkus leat iešguđetge hástalusat iežaset barggus. Bearjadaga leat sii šaddan čoavdit iešguđetge lágan hástalusaid, earret eará skierbmá bohcco áimmahuššat
Politiijain Oarje-Finnmárkkus leat iešguđetge hástalusat iežaset barggus. Bearjadaga leat sii šaddan čoavdit iešguđetge lágan hástalusaid, earret eará skierbmá bohcco áimmahuššat
«Diehtu boahtán ahte Skoađđováris, Álttás lea skierbmá boazu mii lea báhcán ealus jođidettiin. Boazoeaiggát lea ožžon dieđu dan birra», nie čállet sii Twitteris.
Sii dieđihit maid ahte leat olu ealggat Skáiddis, Kvalsund suohkanis. Politiijat ávžžuhit biilavuddjiid várrogasat vuoddjit.
«Bijadii»
Sii čállet vel Twitteris ahte sii galge buktit dieđu ovtta badjel 50-jahkásaš divdui, muhto son gal «bijadii». Son njuikii biilii ja báhtarii politiijain.
Sii vigge vuoddjit ja ohcat dievddu, muhto lei jávkkihan nu eai gávdnan šat su.
Guolleváibmil
Geađgejávrri duollus, 4 miilla Guovdageainnu lulábealde, vikkai okta biila guliid geasehit badjel ráji.
Sus lei 106 kilo eambbo guolli go maid lea lohpi váldit olggos riikas. Biilavuoddji oažžu álkessáhku dan ovddas.
Gaikon rabas mánáidgárddi
Leat gal maid duođalet dáhpáhusat leamaš Oarje-Finnmárkkus. Bossugobis, Álttás, lea muhtun gaikon rabas mánáidgárddi ja suoládan diŋggaid doppe.
Politiijat leat váldán gitta ovtta birrasiid 20-jahkásaš dievddu. Earret eará leat duoguštan báŋkkukoarta sus maid galgá leat mánáidgárddis suoládan.
