Sámediggeráđđi lea juolludan 150 000 ruvnno kulturprográmmii Finnmarksløpet 2015 oktavuođas. Dál beassá ge presideanta Lars Monsena fárrui.
Ihttin beassá ge Sámedikki presideanta (unna govažis) čuovvut ovtta beanaráiddu Álttá guovddážis Sorrisnivai.
Ii ge leat vaikko gean beanaráidu ge, muhto ieš TV-beakkálmasa Lars Monsena ráidu.
– Lea hui somá. Lars Monsen leage mu beavdekaválera vel odne gaskabeivviin Scandicas. Lean su fánsa, ja illudan ihttážii maid, dadjálaste Aili Keskitalo oanehaččat.
Buoridit ovttasbarggu
Lávvordaga diibmu 11.00 álgá ge beakkán beanagilvu Finnmarksløpet mas leat 1000 kilomehter-, 500 kilomehter– ja nuoraidluohkká. Guhkimus mátki lea ge Eurohpá guhkimus beanagilvu. Juolludemiin áigu presideanta Aili Keskitalo vuolggahit buoret ovttasbarggu háhkan dihte eanet einnostahtti rámmaid Finnmarksløpet Siidii.
Dehálaš gávpebuvtta
Keskitalo geassá ovdan ahte Finnmarksløpet ollu jagiid lea ovdánan ja šaddan okta buoremus gávpebuktagiin fylkkas dálvedoaimmaid gaskka ja eko- mátkkoštanealáhusaid gaskka. Dál háliida son kollektiivvalaš bajideami kultuvrralaš oasis prográmmas.
– Kulturprográmma bokte Finnmarksløpet Siida, oažžut mii lávddi ala sámi artisttaid sihke Álttás, Girkonjárggas, Deanus ja Kárášjogas stuora illun oassálastiide, veahkkeapparáhtaide ja gehččiide. Min ulbmil lea oažžut sadjái einnostahtti rámmaid nu ahte boahtteáiggi geahččit maid ožžot vejolašvuođa vásihit dan rikkis kultuvrra mii mis lea fylkkas, lohká presideanta Aili Keskitalo Sámedikki preassadieđáhusas.
