Ođđaseamos loguid mielde ii duššan oktage skábmamánus Davvi-Norgga johtolagas. Muhto seammás leat vearrás logut dán jagi.
Stáda geaidnodoaimmahat čállá iežaset neahttasiiddus ahte skábmamánu ii duššan oktage Davvi-Norgga johtolagas. Obbalaččat dán jagi leat 17 olbmo duššan 14 lihkohisvuođas Davvi-Norggas, ja dat lea guhtta olbmo eanet go diimmá 11 vuosttaš mánu.
14:s dain geat dušše, ledje Nordlánddas. Dat lea ovcci eanet go diibmá. Romssa ja Finnmárkku logut leat historjjálaš vuollin. Romssas dušše guokte olbmo, ja Finnmárkkus okta olmmoš. Diibmá ledje njeallje ja guokte olbmo geat dušše. Stáda geaidnodoaimmahat gohčoda 2019 ollislaččat vearrámus jahkin Davvi-Norggas ovcci jahkái lihkohisvuođaid ektui.
Gaskamearálaččat viđa ovddeš jagi leat 15 olbmo duššan johtolagas ođđajagemánus gitta skábmamánnui, čállá Stáda geaidnodoaimmahat neahttasiidduin.
