Sisáibmováttisvuođaid geažil šaddá Yle Sápmi olu rievdadit iežaset fálaldaga. Nu maiddái leat mearridan otná rájes sáddegoahtit TV-ođđasiid ođaslohkki haga.
Sisáibmováttisvuođaid geažil šaddá Yle Sápmi olu rievdadit iežaset fálaldaga. Nu maiddái leat mearridan otná rájes sáddegoahtit TV-ođđasiid ođaslohkki haga.
Yle Sámi doaimmahuslanjain Anáris lea juo guhkit áigge leamašan heajos áibmu. Dan geažil leat earret eará TV-ođđasiid ođaslohkkit gaskaboddosaččat bargan Yle Mediapolisa TV-studios Tamperes, gos suomagiel guovlo-tv-ođassáddagat báddejuvvojit, čállá Yle Sápmi.
Otná rájes Yle Ođđasiid TV-sátta oažžu ođđa hámi. Dál ii leat šat ođaslohkki gii muitala ođđasiid, nu mo ovdal. Maiddái Ođđasiid buvttadeapmi ollislaččat fárre ruovttoluotta Anárii.
– Sivvan ođđa formáhta atnui váldimii lea dat, ahte ná mii fidnet olles ođasbuvttadeami ruovttoluotta Anárii. Olles bargojoavku lea ovtta dáhki vuolde, nu mii bastit buvttadit govalaččat buoret ja oppalohkái áigeguovdilit sáddagiid, go Tampere-ovttasbarggus, muitala Yle Sámi hoavda Pirita Näkkäläjärvi Yle Sápmái.
Yle Ođđasat leat oidnon Yle váldoođaskanálas Yle TV1:žis juovlamánu 2013 rájes. Dain leat gaskamearálaččat 100 000 geahčči beaivvis.
Sisáibmováttisvuođaid geažil Yle Sámi váldodoaimmahus šattai guođit iežaset viesu juo badjel jagi dassái ja fárret gaskaboddosaččat sámekulturguovddážii Sajosii Anáris, gos atnet guokte unna lanjaža ja nu gohčoduvvon bráhkaid. Skábmamánu 10. beaivvi 2015 Yle Sámi hoavda Pirita Näkkäläjärvi dajai ná:
– Anára doaibmadállu lea divvojuvvon, muhto olbmot gillájit ain sisáibmováttisvuođain.
Odne, bearjadaga ođđajagemánu 29. beaivvi, Yle Sámi hoavda dadjá Ávvirii ná sin váldodoaimmahusa birra:
– Oktii lea juo divvojuvvon, muhto mii buohccáimet ođđasit ja danin fárriimet šilljui bráhkaide ja Áilu (Valle – Ávvir) TV-lágideaddjin Tampere-gávpogii.
Yle Sámi ii dieđe goas sin dilli buorrána.
– Ii leat gullon vel, oanehaččat vástida Näkkäläjärvi.
Yle Sámis lohket sáddaga rievdama leat gaskaboddasaš nuppástuhttimin, muhto eai dieđe vuos goas fas visot boahtá sadjái nu mo lei ovdal sisáibmováttisvuođaid.
