Bargiidbellodaga Vibeke Larsen háliida sámegiela gullot buot medialávddiin árgabeivviid, ja sihtá Sámediggeráđi ovddidit ášši Kulturdepartementii.
Bargiidbellodaga Vibeke Larsen háliida sámegiela gullot buot medialávddiin árgabeivviid, ja sihtá Sámediggeráđi ovddidit ášši Kulturdepartementii.
– Sámediggi ferte sáddet oaiviladdimiid sámegiela birra stuoradiggedieđáhussii kommersiála áibmomedia birra, dadjá Vibeke Larsen.
Stáhta berre gáibidit
Dál bijai Mediaeatnatvuođalávdegoddi ovdan iežas ávžžuhusaid dan birra mot stáhta sáhttá váikkuhit dasa ahte ain gávdno kommersiála áibmomedia. Lávdegoddi govvida earret eará stáhtadoarjaga kommersiála áibmomediai gaskaoapmin vai bisuha dakkár mállet mediakanála.
Dan oktavuođas heive muittuhit ahte sápmelaččat ja earenoamážit sámegillii berre oažžut govttolaš saji kommersiála áibmomedias. Jus iešguđet doarjjaortnegiid bokte addo njuolggo stáhtadoarjja dakkár kommersiála mediakanálii, de berre stáhta nai bidjat gáibádusa ahte sámegiella galgá adnot muhtun osiin sisdoalus, čállá Bargiidbellodat preassadieđáhusas.
Sihtá evttohusa doalvut viidáset
Sámegiella lea ovttadássásaš giella Norggas ja giela seailluheapmi lea dan duohken ahte adno árgabeaivvis buot medialávddiin, maiddái áibmomedias.
– Mii ávžžuhit Sámediggeráđi váldit dán ovdan Kulturdepartemeanttain, nu ahte sámegiella govttolaš lági mielde váldojuvvo vuhtii stuoradiggedieđáhusas áibmomedia birra, mii plána mielde galgá ovdanbiddjot ovdal jahkemolsuma, dadjá Vibeke Larsen.
