Norgga Boazosápmelaččaid Riikkasearvvi (NBR) riikačoahkkimis dahke rievdadusaid njuolggadusain. Okta njuolggadus rievdadeapmi čájeha ahte lea ođđa áigi maid NBR vuogádagas.
Norgga Boazosápmelaččaid Riikkasearvvi (NBR) riikačoahkkimis dahke rievdadusaid njuolggadusain. Okta njuolggadus rievdadeapmi čájeha ahte lea ođđa áigi maid NBR vuogádagas.
Nu go Ávvir čálii ge ovddit vahkus, de galgá NBR riikkastivrras dás duohko leat sohkabeali dáfus dásseárvu, nu gullon 60/40 njuolggadus galgá doaibmagoahtit NBR riikkastivrras maid, ahte galget unnimus 40 proseantta nissonolbmot leat stivrras.
Ođđa áigi
Go njuolggadusaid meannudedje, de lei riikačoahkkin ovttajienalaš go mearridedje ahte galgá, nu guhkás go vejolaš lea, 60/40 leat riikkastivrras maid.
Sii maid rievdadedje sáni njuolggadusain, gos čuoččui: «(…) su (dárogielas: hans) jietna galgá mearrideaddjin leat (…).»
Dainna lei Buolbmát johttisámiid searvvi riikačoahkkináirras, Ellinor Guttorm Utsi, duhtavaš.
– Dat čájeha ahte lea ođđa áigi NBR:i maid boahtán, lohká son.
Nissonolbmo jietna gullot
Son lohká ahte lea buorre go sihkkarasto ahte nissonolbmo jietna gullo riikkastivrras maid.
– Leat olu nieiddat geat leat oahpu váldán, ja leat ain boazodoalus. Sii leat resursan boazodollui, ja maid riikkastivrii.
Earret eará mearridedje maid ahte dál galgá rikkačoahkkin válljet nuoraidlávdegotti áirasiid.
Dál galget dušše válljet vel olles stivrra, mas galgá leat 60/40 sohkabeali dáfus, ja dat lea historjjálaš.
