Dat galgá leat odne, suoidnemánu 13. beaivvi, Ohcejogas.
Duogážin miellačájáhussii lea buođđu mii lea ceggejuvvon Deanučázádahkii eastadan dihtii ruoššaluosaid. Lágideaddjit oaivvildit dat lea baicce vahágin go buorren.
– Sieiddá buođđu, mainna leat viggan eastadit ruoššaluosa goargŋuma, lea stuorra riska Deanu lussii go dat ii fas beasa gođđosajiide ja gártá vuordit buođu vulobealde báhkkasis liegga čázis. Dát buođđu váikkuha olles Deanuleagi olbmuid buresbirgejupmái, čállá Heidi Eriksen Facebookas.
Son nai čujuha dasa go oppalaččat váilu rabasvuohta.
– Eiseválddit eai leat dieđihan doaimmain ja gieldán ovttaskas bargiid muitaleames buođu birra. Deatnogátteolbmot leat issoras fuolas dán oppalaš dilis. Buođu galgá rahpat vai Deanu luossa beassa friija goargŋut, deattuha Eriksen.
Danin bovde olbmuid deaivvadit miellačájáhussii Sieiddá buođu buohta Deanu šaldi vulobealde.
