Sámi ofelaččat leat guhká illudan dán vahkkui, go de galget ovddastit sámiid Nuoraid Olympiagilvvuin Lillehammeris.
Sámi ofelaččat leat guhká illudan dán vahkkui, go de galget ovddastit sámiid Nuoraid Olympiagilvvuin Lillehammeris.
Dábálaččat leat ofelaččat mátkkis miehtá Norgga skuvllain muitaleame sámi kultuvrra ja servvodaga birra, muhto dán vahkku galget sii leat Lillehammeris gos Nuoraid Olympiagilvvut (NOG) leat. Doppe galget sii ovddastit sámiid.
Lisa Kajsa Vesterheim Skoglund ja Elle Káre Somby fitnaba álggus vahkku Oslos ja Troandimis. Troandimis galgaba logaldallat 350 oahpaheaddjestudentii NTNU skuvllas, mii iešalddis lea ođđa vásáhus Elle Kárii ja Lisa Kajsa,i geat vuosttaš geardde logaldallaba nie stuora jovkui. Maŋŋel dan logaldallama dolleba Lillehammerii gos Maien Gaup Sandberg ja Elle Mari Dunfjell Oskal jo leaba NOG-gilvvuid geahččan sotnabeaivvi rájes.
Čalmmustahttet sámi kultuvrra
Dan botta go sii leat Lillehammeris galget sii čalmmustahttit sámevuođa. Earret eará galgaba Elle Mari ja Maien logaldallat joatkkaskuvllain dan guovllus álggus vahkkus.
Bearjadaga ja lávvordaga galget buot njealjis oassálastit nuoraid OG almmolaš prográmmii, logaldallat sihke dárogillii ja eŋgelašgillii rabas logaldallamiin. Sis leat gávttit ja čiŋat mielde, ja áigot čájehit sámevuođa albma ládje.
Ovttasbargoprošeakta
Sámi ofelaččat lea Sámi allaskuvlla ja Gielda- ja ođasmáhttindepartemeantta ovttasbargoprošeakta, mas lea mihttun juohkit dieđuid sámi kultuvrra ja servvodaga birra. Juohke jagi ožžot njeallje sámi nuora dán barggu ja čađahit guđa vahkkosaš kurssa Sámi allaskuvllas, ja loahpahit eksámeniin mas ožžot 15 oahppočuoggá, ovdal go vulget mátkkoštit Norggas.
