SR Sámerádio seaguhii gáimmežiid, ja jearahalai Anders Somby Jr. njuolggosáddagis rádios, vaikko ledje oaivvildan juristta Ande Somby jearahallat.
SR Sámerádio seaguhii gáimmežiid, ja jearahalai Anders Somby Jr. njuolggosáddagis rádios, vaikko ledje oaivvildan juristta Ande Somby jearahallat.
Boazodoalli Anders Somby Jr. jearahallojuvvui telefuvnna bokte SR Sámerádio prográmmii «geasserádio», ja fuomášii easka maŋŋel go gulai sáddaga ahte su dat leat dál navdán leahkit su gáibmin Ande Sombyn, gii lea Norgga árktalaš universitehta vuosttašamanueansa.
Máhtii vástidit
Anders Somby Jr. muitala ahte SR Sámerádio riŋgii sutnje ja sii šihtte áiggi goas fas riŋgejit dahkat jearahallama.
– Mun ledjen ráhkkaneame vuolgit čohkket ealu, inge das gal smiehttan nu ollu go áigo jearahallat Stiertná alimusriekteášši birra mii dál lea jođus. Oainnat iežan mielas mun gal dieid áššiid máhtán bajil, go lean politihkalaččat bargan áššiiguin ja mus dat gal lei vástádus sin gažaldagaide áššis, reašká son.
Rádioáššis gulláge ahte Sombys leat buorit čilgehusat áššis.
Gulai easka nuppe beaivvi
Anders Somby Jr. gulai de nuppe beaivvi easka sáddaga rádios, ja fuomášii ahte dál son gal lea šaddan Norgga árktalaš universitehta vuosttašamanueansan.
– Gal dat lei hearvái, ja mun de riŋgejin dohko dieđihit dál lea vearrut šaddan, ja de ipmirdin ovttatmano ahte leat oaivvildan mu gáimmi jearahallat.
Ii vuosttaš geardde
Anders Somby Jr. lohká reaškán bures áššis, iige loga vuosttaš geardde go sudnos gáimmiin leat váldán vearrut.
– Lea geavvan ahte olbmot leat geahččalan mu bivdit advokáhttan sidjiide, ja sádden munnje áššebáhpiriid. Mun de lean ferten dieđihit ahte in leat advokáhtta ja dasa vástádussan lean fállojuvvon eanet bálkká jus ovddastan sin, muitala Somby.
Eai fuobmánge
SR Sámerádio fuolaheaddji Karen Eira duođašta Anders Somby fearána, ja lohká nie sáhttá jođánit geavvat hušas árgabeaivvis. Sii eai oba fuobmánge ahte leat seaguhan dan guokte Ándde.
– Mii galggaimet hupmat juristtain Ande Sombyin, ja mun dat riŋgejin šiehttat jearahallama. Telefuvnna bokte jerren ovdal sáddaga veaháš dan Stiertná ášši birra, ja go Anders Somby Jr. vástidii dego livččii juristta, de in moaitán maidege ahte dá ii leat jurista Ánde. Go ii dovdda jienas olbmuid, ja ságain ii nagot earuhit, de lea váttis fuobmát, lohká Eira.
Šállošit
Go sii fuomášedje meaddima de boagustedje bures iežaset meaddima. Vaikko šattaige hui suohtas fearán, de lea Eira mielas duođalaš nie seaguhit olbmuid ja lohká sin áigut boahtteáiggis buorebut dárkkistit ahte leat rievttes olbmo ožžon ságaide.
– Mii šállošit meaddima, ja nu movt mii oaidnit ášši, de ii leat eará go dainna namain meaddán. Ášši gal šattai buorre ja mii eat leat váldán ášši eret neahtas, lohká Eira.
– Gáibmi gal máhttá
Norgga árktalaš universitehta vuosttašamanueansa Ande Somby ii lean gullan rádiosáddaga go Ávvir válddii suinna oktavuođa, ja lohká ii leat buorre diehtit movt son livččii vástidan áššis. Son goitge jáhkká su gáibmi dat gal dáidá máhttán vástidit.
– Gáibmi lea politihkalaččat bargan ollu diekkár vuoigatvuođaáššiiguin, nu ahte sutnje lea lunddolaš daid birra muitalit mediai, lohká Ande Somby,
SR Sámeradio sáddaga gulat dáppe. Anders Somby Jr. jearahallan álgá 19. minuhttas sáddagis.
