Go Liv Mæsel Rundberg ja Herborg Rundberg boahtiba Márkomennui dán duorastaga, de lea sudnos fárus sámi sálbmačiehká.
Etnešguovttos Liv Mæsel Rundberg ja Herborg Rundberg boahtiba Márkomennui čuojahit beaivekonseartta Skániid girkus. Fárus sudnos lea sámi sálbmačiehká.
– Šaddá gelddolaš oaidnit dovdetgo guldaleaddjit Oarje-Romssas ja Nuorta-Nordlánddas daid sálbmašuoŋaid mat munnos leat mielde. Letne ovdanbuktán máŋga dáin šuoŋain Davvi-Romssas ja Romssa gávpogis, dadjaba Liv Mæsel Rundberg ja Herborg Rundberg.
Beaivekonsearttas čuojaheaba ovttas, ja šaddá maiddá solo piano. Dasa lassin bovdeba guldaleddjiid searvat lávlumii. Soai dat leaba pianisttat dan stuorra musihkkárveagas, ja lea vuosttaš háve go sudnos lea konsearta dušše sudnos.
Skániid girkus
– Mii illudat dasa. Lea hui somá bovdejuvvot doallat konseartta Skániid girkus, mii lea nu fiinna girku, dadjaba Liv Mæsel Rundberg ja Herborg Rundberg.
Liv Mæsel Rundberg lea máŋggabealat kulturbargi ja lea earret eará leamaš organistan ja rektorin Gáivuona kulturskuvllas. Son lea čohkken boares sámi lestadiánalaš sálmmaid, ja 2011:s geigejuvvui sutnje Gonagasa silba ánsomedálja. Herborg Rundberg lea máŋga jagi bargan sámi musihkain ja 2010:s almmuhii soloskearru Árbi, pianomusihkka mas leat boares mearrasámi sálbmašuoŋat vuođđun. Fraseren, leaktu ja dajahallanšuokŋa mearrasámi sálbmaárbevierus lea šaddan dehálaš oassin su piano-čuojaheamis.
Beaivekonsearta lágiduvvo Skániid girkkus duorastaga suoidnemánu 23.beaivvi ja lea nuvttá. Lea kolleakta konseartta maŋŋil. Beaivekonsearta lágiduvvo ovttas Skániid girkuin. Márkomeannu lágiduvvo suoidnemánu 23.–25.beaivai.
