Sámi servodagas lea stuorra dárbu oažžut eanet digitaliserendoaibmabijuid ja -áŋgiruššamiid. – Sámi perspektiiva ferte árrat mielde buot digitaliserenbargguin maid iešguđege instánssat dahket, oaivvilda sámediggeráđđi Henrik Olsen (NSR).
Dán vahkus meannuda Sámedikki dievasčoahkkin stuorradiggedieđáhusa sámi giela, kultuvrra ja servodateallima birra, čállá Sámediggi preassadieđáhusa. Stuorradiggedieđáhus lea boahtteáigái čujuheaddji dieđáhus Stuorradiggái sámepolitihka birra, ja das válddahuvvojit ovdánandovdomearkkat ja hástalusat sámi giela, kultuvrra ja servodateallima ektui, ja bálvalusfálaldagat sámi ássiide. Dál lea nubbi jahki go dakkár dieđáhus čállojuvvo, ja fáddán lea dál digitaliseren.
– Stuorra nationála áŋgiruššamiid oktavuođas ii leat ovddiduvvon vásttolaš fálaldat sámegielaide. Mii vuordit ahte stuorradiggedieđáhusas čájehuvvo makkár dárbu lea sámi servodagas, ja háliidat ahte dát dieđáhus lea lávki dohko guvlui ahte sámi perspektiivva implementerejuvvo stuorra nationála áŋgiruššamiidda, dadjá Olsen preassadieđáhus.
Eahpesihkar mihttomearrái
Ovddeš stáhtabušeahtain leaŧ áŋgiruššan ollu digitaliserema ektui. 2019 ja 2020 stáhtabušeahtain lea biddjojuvvon 2,4 miljárdda ruvnno digitaliserendoaibmabijuide, ja 2021 stáhtabušeahta evttohusas lea biddjojuvvon 1,5 miljárdda ruvnno. 2021 stáhtabušeahtas lea evttohuvvon 15 miljon ruvnno digitála sámegiela oahpponeavvuide sámi mánáide ja nuoraide, muhto ruđat eai leat biddjojuvvon guđege daid bušeahttadárbbuide maid Sámediggi lei ovddidan.
– Mii leimmet sávvan ahte dieđáhusas livččii čielgaseappot boahtán ovdan mii ráđđehusa mihttomearri lea sámi servodaga digitaliseremii.
Oktasaš ovddasvástádus
Olsen háliida stuorát áŋgiruššama digitaliseremiin sámi servodagas, ja mihttomearrin lea ahte sámi álbmogis galgá leat digitálafálaldagat mat leat ovttaárvosašaččat muđui Norgga álbmogiin.
– Sámedikkis ii leat okto ovddasvástádus digitála fálaldaga ovddideamis sámegielaide. Dat lea oktasaš ovddasvástádus, loahpaha Olsen.
