Guovdageainnu nieida Caroline Rasdal Kemi lea mielde Robinson tv-ráiddus mii álgá njukčamánu álggus.
Guovdageainnu nieida Caroline Rasdal Kemi lea mielde Robinson tv-ráiddus mii álgá njukčamánu álggus.
Robinson tv-ráidu lea filbmejuvvon Filippinene sulluin diibmá miessemánu ja geassemánu. Muhtimat oasseváldiin suorganedje go nu bahkka doppe lei, ja okta ges váillahii iežas ullosuohkuid ijaid.
Tv-ráidu álgá sotnabeaivvi eahkedis njukčamánu 6.beaivvi ja oidno TV2 kanálas.
Bahkka lea hástalus
20-jahkásaš Guovdageainnu nieida Caroline Rasdal Kemi lea mielde Robinson tv-ráiddus . Go jerre sus mii boahtá leat stuorimus hástalus sutnje, de vástidii:
– Dat šaddá várra bahkka. Mun lean Guovdageainnus eret ja doppe lea čoaskkis. Jus lea lihkku, de soaitá leat 20 lieggagráda, muhto dat ii leat dávjá, lohká Kemi TV2 siiddus.
Soaitá gehččiid jiellat
Prográmmajođiheaddji Christer Falck jáhkká Caroline šaddat tv-gehččiid jiellahin dán giđa.
– Sámi nieida ii leat nu guhkás mátkkoštan ovdal. Son lea fitnan Bulgarias ovdal, muhto dalle lei su mielas nu bahkka ahte gosii jámálga, muitala Falck.
Losit go ovdal
Prográmmajođiheaddji oaivvilda dán jagáš ekspedišuvdna lea lossadet go goassege ovdal. Dán jagi galget oasseváldit ieža birget álggu rájes, ja eai oaččo biepmu ja cahkkehaga mainna ráhkadit dola, nu go ovdal leat ožžon.
Falck muitala ahte ii leat ávki jus oasseváldit ožžot guoli jus eai sáhte bassit dan.
– Biepmu haga sáhttet jođánit šaddat riiddut go oasseváldit leat nelgon ja váiban, lohká Falck.