Diibmá ledje Norgga beale ávvudoaluin, dál čavgejit Ruoŧa beale Sápmái teáhterbihtáin.
Sámi mánáid teáhtera mánát leat muittohallan 60 siidosaš giehtačállosa bajiloaivvi, ja dál leat ráhkkaneame vuosttaš čájálmassii.
Guovvamánus galget sii 100-jagi ávvudeapmái Ruŧŧii, Staarii.
Doppe sii čájehit maid teáhtera, mainna leat čavčča bargan, dieđiha Sámi mánáid teáhter preassadieđáhusas.
Hirpmástuhttán
Neavttárat leat nuoraidskuvlaoahppit, ja sii leat hirpmahuhttán iežaset oahpaheaddji ja bagadalli Ebba Lovise Joks.
– Mun álo nu hirpmástuvan man ollu nuorat háliidit bargat, ja man guhkás sii vanahit iežaset. Oahppit leat čavčča suoskan, smirezastán, vuoigŋan ja niegadan HYENAT-muitalusa, ráhkadan dihte nu bures go mii máhttit. Sii leat bidjan ollu iežaset áiggis ja ráhkisvuođa dasa, lohká son preassadieđáhusas.
Tråantes ja dál Staarii
Sámi mánáid teáhter lea šaddan Deanu Kulturskuvlla siste, ja sii čájehit dávjá sámegielat olleseahket teáhterčájálmasaid. Sii leat johtán Fearasulluin, Duiskkas ja miehtá Davvirikkain.
Diibmá ledje maid mielde Tråante 2017 doaluin.
– Munnje lea nu earenoamáš somá beassat nuoraiguin bargat ja oaidnit ahte sii ovdánit nannosit sihke gielalaččat, teáhterfágalaččat ja olmmožin. Lean hui buorre ohppiide, lohká Joks.
Nuorra nieiddaid eallima birra
Hyenat-čájálmasas lea vuosttaš čájeheapmi Deanu birasvisttis, ođđajagemánu 17. beaivvi.
«Hyenat» lea vihtta nieidda birra. Sii eai leat doarvái čábbát, jierbmát, coolat ja leat veahá ártegat.
Go ožžot iežaset oahpaheaddjis bargobihtá Savannah birra, de šaddet hyenan. Sii eai šat beroš makkárat leat oaidnit, ja nu guhká go leat joavkun, de eai beroš mas ge.
– Čájálmas lea measta balddihahtti áigeguovdil, go jurddaša servodaga rievdama ja nuorra olbmuid, eandalii nieidaolbmuid psykalaš dearvvašvuođa. Hyenat váldet fámu čohka bilkidan gávdnasiin, ja hájain. Ii olmmoš sáhte digaštallat dahje moktiige ákkastallat bilku-boagustemiin. Son gii boagusta son vuoitá. Sávan ahte geahččit návddašit čájálmasa, lohká Ebba Lovise Joks.
Čájálmas lea sámegillii, ja tekstejuvvo ruoŧagillii. Anders Dus lea čállán «Hyener». Johan Sara jr. lea komponeren musihka, ja Ebba Lovise Joks lea bagadalli.
