Sámi jienat skádje Háršttain

Konsearta geasuhii olbmuid hui bures. Sihke konsearttas ja maŋŋel bohte muhtun olbmuin garra dovddut ja gatnjalat maid golggiidedje.

Dirigeanta duhtavaš

Ollu olbmot ledje boahtán go Sámi Jienat koarra doalai konseartta. Sii lávllo ja juige sihke árbevirolaš ja ođđasit luđiid. Luođit ledje iešguđetge guovllus miehtá Sámi. Sotnabeaivvi lei Hárštták gávpoga vuorru beassat gullat go Sámi Jienat koara juoiggai.

Dirigeanta Bernt Mikkel Haglund muitalii maŋŋel konseartta ahte juoigit ledje čeahpit.

– Sii leat oadjebasat ja movttegat ja de láve mannat bures. Olbmot maid liikojedje bures dasa maid besse gullat, logai son.

– Somá gullat dološ luđiid

Sámi Jienat leat johtán viidát ja ovttasbargan mentoriiguin geat leat oahpahan sin iežaset guovlluid luđiid. Buot luđiid lea dirigeanta Bernt Mikkel Haglund heivehan ja ođasmahttán. Son lea korrii heivehan buot maid sii čađahedje Feastariemuid doaluid oktavuođas.

Martin Rimpi, gii orru Háršttain, muhto lea eret Divttasvuonas, lei okta dain geat ledje boahtán gullat konseartta.

– Lei somá gullat dološ luđiid koara ođđa hámis ja erenoamáš suohtas gullat Lulli-Sámi luođi. Diet Kárášjoga luohti lei erenoamáš fiinnis, logai son.

Guldaleaddjit háliidedje čuoikaluođi gullat

Tenora ja solojuoigi Ánte Mihkkal Gaup spiehkastii veahá prográmmas, go son hástalii guldaleddjiid evttohit makkár luđiid galget juoigat.

– Mu oassi ii lean dan prográmmas. Mu ulbmil lei oažžut olbmuid konseartasálas mielde juoigat. Oažžut álbmoga čuovvolit luođi. Danne mun jerren ge makkár luođi mun ja mii galgat juoigat. Máŋggas sihte čuoikka juoigat. Dat heivii hui bures go mun ledjen jurddašan dan dat dál heivešii juoiggastit go dál čuike Sámis mihcamáraid áigge. Lei nu somá go olles sála lei mielde juoigamis, čilge son.

Dasa gal liikui guldaleaddji Nils Arne Rasmus, guhte lea bajásšaddan Deanuleagis, muhto dál ássá Háršttain.

– Lei somá gullat go sii juige elliid nu go čuoikka, lottiid ja muđui luonddu juige, logai son.

Čállán: Mikkel-Per Sara