Álttá Sámi Giellaguovddáš lágidii mannan lávvardateahket Halloween-doaluid sámi mánáide Álttá Siiddas.
Álttá Sámi Giellaguovddáš lágidii mannan lávvardateahket Halloween-doaluid sámi mánáide Álttá Siiddas.
Lávvardateahket ledje Álttá Siiddas Halloween-doalut sámi mánáide maid Álttá Sámi giellaguovddáš lágidii Mánáideahket-jovkui. Dohko ledje boahtán sullii 25 máná, 1. luohkás gitta 7. luohká rádjái, ja sii ledje sihke vuoiddadan ja gárvodan romet.
– Mii guossoheimmet sihke heavssásuorpmaid, varrajuhkamušaid, varrapopcornaid, gáhkuid ja njálgáid buohkaide geat fitne guossis, čállá Ina Marita Turi preassadieđáhusas, gii lea Álttá Sámi Giellaguovddáža Mánáideahkeda prošeaktajođiheaddji.
Doppe lágiduvvojedje maiddái soigosis stohkosat, nu mo ohcat čoavdagiid givnniid siste mat ledje issorasat ja man dievva ledje “baikkat”. Sii galge maid njálmmiin dohppet eappeliid ja báhčit gopmiid.
– Doalut biste njeallje diimmu ja mii loahpaheimmet daid “knask ja knep” nammasaš vázzinstohkosiin ja mánát ledje máilmmi duhtavaččat, čállá Ina Marita Turi.
