Dovddus Binttá goavddis lea okta dain historjjálaš kulturdávviriin mat sáhttet máhcahuvvot sámi museaide Bååstede-prošeavtta oktavuođas.
Dovddus Binttá goavddis lea okta dain historjjálaš kulturdávviriin mat sáhttet máhcahuvvot sámi museaide Bååstede-prošeavtta oktavuođas.
Máŋga čuođi jagi leat dutkit ja miššonearat čohkken sámi kulturdávviriid. Binttá goavddis Helgelánddas sáhttá máhcahuvvot Saemien Sijtii Snoasai.
– Lea hui stuora árvu oažžut ruovttoluotta goavdása sámi opmodahkan. Goavdásat leat leamaš deaŧalaččat árbevirolaš sámi oskkus mainna viežžat dieđuid boahtteáiggi birra, dadjá sámediggeráđđi Henrik Olsen preassadieđáhusas. Dál leat vel dušše moadde goavdása áimmuin, ii okta ge sámi oapmin, ja danne mii leat ilus go goavddis máhcahuvvo, dadjá Olsen.
Váldit historjjá ruovttoluotta
Jagis 2012 vuolláičálii Sámediggi šiehtadusa Norgga álbmotmuseain ja kulturhistorjjálaš museain ahte máhcahuvvojit badjel 2000 historjjálaš dávvira sámi museaide.
Váilevaš ruhtadeapmi
Sámediggi lea máŋggaid jagiid bivdán Norgga eiseválddiid ruhtadit máhcaheami. Sámi museain eai leat dál ekonomalaš resurssat, teknihkalaš konserváhtorgelbbolašvuohta ja lanjat gosa vurket dáid dávviriid.
– Mii galgat ieža sáhttit hálddašit iežamet kulturárbbi. Dat riekti lea mis álgoálbmogin. Danne fertejit eiseválddit juolludit doarvái ekonomalaš resurssaid sámi kulturárbbi máhcaheapmái Norgga álbmotmuseas ja kulturhistorjjálaš museas (UiO), dadjá sámediggeráđđi Henrik Olsen.
Dievasčoahkkin meannuda ášši duorastaga čakčamánu 24. b. maŋŋá dii. 15.00.
Loga eanet goavdása birra dás (wikipedia: dárogillii).
