Sámi falimus heargevuoddji manaha gonagasgilvvuid go roasmmohuvai go lei hearggi dápmamin.
Báišduoddara beakkán heargevuoddji, Uula-Petteri Somby, lea kvalifiseren Suoma Bálgosiid Ovttastumi Boazocupgilvvus gonagasgilvui mat álget otne Anáris. Son galggai vuodjit gonagasluohkás Eveliina Länsman (15) herggiin «Nigga», muhto dađe bahábut lea son doaddján gieđa ja massá dán jagáš olahusa.
– Váivi, gal dat manai jo helvehii. Gonagasgilvu han lea min buohkaid niehku ja mihttu, dasa mii buohkat rahčat beassat. Muhto dál in beasa in makkárge luohkás gilvalit, dadjá Somby.
Uula-Petteri Somby dojii gieđa gaskavahku go lei láidemin ja hárjehallamin iežas ođđa hearggi
–Gonagasgilvu han lea min buohkaid niehku ja mihttu, dasa mii buohkat rahčat beassat. Muhto dál in beasa in makkárge luohkás gilvalit.
Hástalus
Son lea okta dain heargevuddjiin gii lea guhkkit áigge juo leamašan mielde heargegilvvohallamis. Son lea gilvalan buot gilvvuin measta mat juo gávdnojit. Dán jagi lea son rangerejuvvon viđádin buoremussan heargevuddjiid Cup oktavuođas, ja listu mielde lea son sámi buoremus vuoddji. Son muitala lea šaddan stuorra hástalus dál go son lea roasmmohuvvon.
– Leat iskkadeamen dál gii sáhttá vuodjit mu ovddas, dadjá Somby.
Olles jearahallama logat lávvordaga báberaviissas.
